豬流感蔓延全球，十足火燒連環船，全世界已冇乜邊處地方係安全，呢個炸彈一日未除，旅遊生意都冇運行，城中名人早已計劃暑假齊齊閉關避疫，唔願出門。
卓妮日前喺個端午節活動上見到行會成員劉皇發嘅太太發嬸，講起暑假有乜節目，發嬸扁晒嘴話好頭痛。唔通發嬸怕使錢？非也。頭痛皆因發叔家族人多勢眾，每次出門旅行連同八個內孫及外孫在內，大大話話有成十八人齊齊出門，單係諗去邊度玩都可以傾足三日三夜。
平叔為太太分房瞓
發嬸話，本來每年復活節及暑假一家人例必首選去日本玩，可惜日本都「領」咗豬流感，為免家人中招，惟有避之則吉。之不過改去第二個國家都唔易，發嬸話擔心孫仔、孫女年紀仲細，抵抗力唔及大人強，驚搭飛機時無端受牽連，到時成家有排煩，所以發嬸傾向唔外遊，但一諗到家中幾個乖孫肯定「唔收貨」，真係左右做人難囉。
發嬸十五十六，前公務員事務局局長王永平就早已打退堂鼓。平叔尋日現身香港會，提起旅行就瞪大雙眼話：「仲去旅行？豬流感喎！」平叔份人好講衞生，平日有傷風感冒都會同太太分房瞓，要佢喺高危時期同成班「隱形病人」同機，真係打死都唔制。平叔話寧願埋首寫書，執靚佢本書《平心直說》修訂版，等七月面世時好好睇睇。
卓妮問佢何解出書只有幾個月就急急出修訂版，唔通印錯嘢？平叔解釋話，本書以評論政府政策為大前提，近日政府推出唔少新花招，為免畀人覺得本書過時，要加番啲新料入去，繼續口誅筆伐，
實政府喎！
卓妮