本文重點
由今屆開始，立法會議員每年可享二萬六千一百三十元醫療津貼，連牙科同醫療保險都包埋。我哋最近翻查議員開支申報紀錄，發覺唔少議員都有享用呢個福利，當中最識得善用呢項津貼嘅，就非工程界代表何鍾泰莫屬。何鍾泰由去年十月到今年二月，已經申領咗約萬九蚊醫療津貼，睇番啲單據，原來佢一個月都會去浸大中醫專科診所接受兩至三次針灸，而且佢仲買咗份萬五蚊嘅住院保險，難怪份津貼咁快就使得七七八八啦。
立會事忙 無暇運動
何鍾泰尋日同我哋解釋，近期迷上中醫都係因為立法會工作太過繁重，立法會研究雷曼事宜小組委員會只計預備會都開咗八十幾次，身為委員會主席嘅何鍾泰都忍唔住呻辛苦，話自己以前仲會間唔中去跑步練氣，但依家忙到一日瞓得三、四個鐘，根本抽唔到時間做運動，所以惟有靠中醫調理吓身子囉。佢好認真咁話：「血氣流通對身體好緊要！」所以聲言冇乜病痛嘅佢鍾意去針灸，打通全身經脈，行氣活血喎。
不過何鍾泰話愛上針灸，都係最近嘅事。佢聽人講浸大中醫專科診所啲醫師好出名，所以就摸上去幫襯，結果一針扎下，果然成身鬆晒，自此之後就欲罷不能，一針再針；佢搵開嗰個，仲係臨床部一級講師，喺內地中醫學院攞咗醫學學士學位添。
睇番佢張藥費單，大概分為三類收費：三百元針灸、百五至三百元中藥費、六十至一百二十元代煎中藥。雖然何鍾泰睇醫生都有折頭，但每次醫藥費計計埋埋都要成五百至七百元不等，如果冇津貼攞，都咪話唔肉痛。
睇番其他議員嘅申報，唔少只係花幾百蚊睇醫生或者牙醫，好似保險界新丁陳健波咁，今年只係睇咗五百蚊牙醫及千四蚊西醫，唔係好多人好似何鍾泰咁頻頻睇醫生。不過，何鍾泰反而呻笨，仲羨慕其他冇買醫療保險嘅議員一年有兩萬幾蚊睇醫生，話買完醫療保險後剩低一萬蚊左右，投保至今都「用唔着」，所以諗住一到期就Cut咗張保單「止蝕」。何鍾泰連攞津貼都計到咁盡，下屆立法會選舉不妨轉戰會計界，可能勝算機會更大。