本文重點
【本報訊】王良煥的正職為華懋集團工程判頭，但他原來也有一份長達十七年「兼職」，不但無薪水，而且要「貼錢」。王聲稱，他曾出錢幫龔如心買早餐、拜神祭品、生果及私人日用品，甚至半夜到龔如心的會議室捉老鼠，且一直未收錢，王更打趣說會到天堂向龔如心索回款項。
笑稱：到天堂去攞
王良煥作供說：「每個公眾假期、假日，幫佢（龔如心）買早餐，生果就十日到，私人日用品用完，佢就叫我幫佢買，拜神都一樣，華懋到依家都未畀錢我，事頭婆（龔如心）話會記住我，等我去天堂時去攞。」他及後在庭內澄清去天堂並非出於龔如心的口中，而是他自己講笑。
另外，龔如心於九十年代某晚十一時許曾致電給王良煥，王說：「佢（龔如心）天花板有老鼠走嚟走去，走到佢好唔自在。」王良煥當晚半夜到場，由尖東華懋廣場的控制中心開始檢查，一直查到會議室。
王良煥在庭上稱，他早於○六年夏天看到龔如心聲沙及很瘦，已知道龔如心有病，龔如心當時說有感冒，他曾建議帶龔如心回內地看中醫，更勸龔如心「唔好咁勞碌咁辛苦」。龔叫他買榴槤，他卻買了山竹給她。
王續說：「如果唔係（龔如心自己說有病），打死我，我都唔會話佢有病。」因此，龔於○六年中秋節正式告訴王自己有病，王才「正式知道」她有病。
王於作供期間，曾稱呼龔如心為「事頭婆」、「老闆娘」和「王太后」，但原來兩人已超於一般主僕關係。他於作供完畢後說：「我同王德輝係好（同鄉）兄弟，同龔如心則係好朋友。」他與龔如心相識卅餘年，覺得她「好好人」。