去年十月新一屆立法會啱啱開會期間，唔少新丁議員都先後大爆蝦碌，例如陳淑莊就因為唔認得立法會大樓內嘅通道，要保安人員提點先搵到地方解決佢嘅生理需要。李慧琼（Starry）尋日接受電視訪問時，自爆喺大半年前第一次開立法會大會時發生嘅一件瘀事，原來佢當日一早約咗人喺附近午膳，點知佢一路好留心咁開會，開開吓先突然發現過晒鐘，仲反問其他同事：「乜唔係有午膳時間嘅咩？」查實立法會係接連咁開會，冇午飯同晚飯時間㗎。
Starry又透露，佢喺九九年以獨立人士身份首次參選區議會，佢媽媽其實非常反對，認為根本冇機會贏，點知佢不但打敗咗當區嘅現任議員，仲喺○三年成功連任，依家仲做埋立法會議員。不過佢同時亦指出，做咗立法會議員大半年，發覺真係會冇晒私人時間，依家最多只得星期日同公眾假期陪到屋企人，如果將來囡囡話要學媽媽咁從政，佢唔會一刀切反對，但亦會同佢講清楚當中嘅得着同代價。