本文重點
上屆立法會前後搞咗十幾個公費外訪團，打破歷來紀錄，其中一個杜拜、西班牙、德國同美國超豪外訪團，更畀人質疑濫用公帑。今屆立法會履新都唔夠一年，班議員又密謀整番個東歐三國外訪團。為免議員再次爭崩頭爆出醜聞，佢哋仲自創咗一套外遊比例代表制，私下定好八個免費歐遊名額嘅分配方法。
立法會每年都會預留撥款，畀轄下嘅議會聯絡小組組團外訪，同其他國家嘅立法機關進行交流，最重要係呢筆錢仲唔使計入每名議員每屆嘅外訪開支限額，絕對着數。九九年首屆立法會，就有多達十七名議員為咗爭奪八個免費外遊名額而嗌大交，最終迫使第二屆立法會要特別訂下準則，按照各黨派同獨立議員嘅議席數目，以類似比例代表制嘅方式分配有關名額。
按政治聯繫分四組
今屆立法會嘅聯絡小組早前開會，建議喺嚟緊九月組團出訪捷克、克羅地亞同匈牙利，理由係呢東歐三國都係新興民主國家，佢哋嘅政改經驗值得香港參考。
呢次歐遊團全程十至十二日，估計每人使費最少要成三、四萬元，如果坐商務客位更加可能高達六、七萬，八個免費名額即係要成四、五十萬，分分鐘一鋪過就使晒今屆四年任期預留嘅四十九萬五千元外遊撥款，可謂機會難逢、一瞬即逝。為免班同事再次爭崩頭，聯絡小組就決定沿用第二屆立法會嘅準則，將六十名議員按其政治聯繫分為四大組別，「圍威喂」瓜分呢八個名額。
睇番呢四大組別，Ａ組係聯絡小組主席石禮謙同副主席劉慧卿之爭；Ｂ組由九名民建聯議員之中揀一個，據聞以新丁陳克勤「中獎」嘅機會較高；Ｃ組係劉慧卿以外嘅泛民主派議員，二十二人爭三個位；不過佢哋都唔夠Ｄ組咁競爭激烈，自由黨、工聯會、專業會議、五散人、3L、詹Sir二人組、再加六名單丁建制派，二十六人爭三個位，名副其實係一場大混戰。
立法會內務委員會今日會討論有關外訪建議同分餅仔方法，預計九成九會大比數通過。其實啲議員成日話啲公帑要有針對性咁用喺最有需要嘅人身上，不如以後考慮吓整番個議員資產及入息審查，淨係資助啲最窮嘅議員外訪，又或者按議員嘅出席率及提出質詢同動議嘅次數，以多勞多得原則獎勵同懲罰吓班議員，咁樣啲納稅人交稅先會交得順氣啲！