兩岸關係撲朔迷離，即使中央近年擺明車馬要同台灣改善關係，不過，一向反應慢半拍嘅特區政府成日抱住少做少錯，唔做唔錯嘅觀念，除咗早前民政事務局局長曾德成利用世界佛教論壇港澳代表團名譽團長嘅身份訪台外，依家都仲未有人敢以官方身份赴台。
相對於港府嘅閃縮，台灣方面就進取得多，繼上個月胡志強堂堂正正以台中市長嘅身份率代表團出席香港台灣城市交流論壇後，台灣駐港機構中華旅行社總經理楊家駿尋日更夥拍中華航空香港分公司總經理孫鴻文，參加東區龍舟競渡大賽，實行透過民間活動融入香港。楊家駿話，明白到港台都有意加強交流，但係具體情況仲要等港府提出，佢強調「台灣從來沒有拒絕任何一個香港人、香港官員去台灣」。
講返場龍舟賽事，中華航空龍舟隊可能第一次參加龍舟比賽未熟水性，所以連戰兩場都只得尾二，無緣進身決賽。楊家駿就覺得勝負係次要，最緊要係融入群眾，佢仲話嚟緊想參加渣打馬拉松，即使自己唔夠氣跑，都會叫個仔落場喎。如果港府都可以好似佢咁落力、積極，港台關係話唔定好快可以突飛猛進。