長江實業董事總經理兼副主席、長實主席李嘉誠大仔李澤鉅（Victor）尋日喺加拿大，接受加拿大西安大略大學頒授嘅榮譽法學博士學位。佢話得悉獲頒學位後，靜落嚟回想過去廿幾年來嘅從商經歷，講到長江集團嘅成功之道，佢話如果試圖講話有單一嘅秘訣，相信大家都以為佢講笑，倒不如提醒大家必須警惕及迴避嘅絆腳石。
Victor將要講嘅嘢歸納成三點，第一不要自滿於以為已成功在握，俗語云三人行必有我師，要不停從良師身上學習乜嘢應該做、唔應該做，第二係唔可以只爭朝夕而不顧長遠，因為短期嘅盈利往往令人沖昏頭腦、趨之若鶩，甚至會前仆後繼。佢話長期投資講求耐心與努力，大部分人唔會樂在其中，競爭自然較小，對長線投資者嚟講，自然較為有利。
Victor話最後就係要謹記小時候祖父母同父母就誠信、責任感、正直、誠實及誠懇嘅教誨，記住晒呢啲，成功機會就會增加，亦會成為地球村中有名望的村民，聲望同財富，至會長久。