政情:方剛出街唔帶環保袋

立法會通過咗議案,由七月七日開始市民用膠袋就要畀膠袋稅。喺正式收稅前,政府就舉辦連串活動,呼籲市民買嘢時自備環保袋,少啲攞膠袋。有份出席活動嘅立法會議員方剛,係其中一個投票支持徵收膠袋稅嘅立法會議員,但原來佢平時係唔帶環保袋出街㗎喎。點解呢?方剛話,唔拎環保袋係因為平時好少shopping喎。但萬一佢買咗嘢,冇理由乜都用手拎住㗎!方剛話佢嘅法寶就係佢架車嘞。佢話會將買嘅嘢放晒喺佢架車度,咁就唔使用膠袋,連環保袋都慳埋啦!

負責硬銷膠袋稅嘅環境局局長邱騰華尋日出席一個膠袋稅嘅宣傳活動時,除咗記住帶埋佢嘅基本裝備,將個摺好咗嘅環保袋掛喺皮帶度之外,仲畫埋畫添,佢即場搵咗個新嘅環保袋,喺上面畫咗個「綠色香港」嘅logo,畫得又快又似,可能閉門練功,練咗好耐。雖然借筆畀佢畫畫嘅小朋友唔肯要佢個袋,但立即就有市民接收咗。拎住個高官親手畫嘅環保袋,呢位市民應該日日都會帶出街,用少好多個膠袋啦!

直擊人類豬流感最新疫情
詳情瀏覽on.cc《奪命流感》