往來屯門碼頭至港鐵上水站的44號專線小巴，為屯門至上水的主要接駁交通工具之一，因乘客人數眾多而班次頻密。不過，首次乘搭的張小姐卻經歷一次難忘之旅。張憶述，當日由上水乘搭44號專線往屯門，小巴甫駛上高速公路，在限速八十至一百公里的公路上，車速顯示器竟長期超逾一百公里，只花了十五分鐘便到達屯門巿中心，「我打警察交通熱線投訴，個職員叫我去警署落口供，咁即係叫人唔好投訴啦！」
搭車搵命博乘客無奈
同樣曾踏上「亡命小巴」的陳先生，談及經過時猶有餘悸，「架紅Van唔使廿分鐘就由旺角去到屯門，喺青山公路嗰段，司機仲不停咁畀油，條路得（限速）七十（公里），但開到一百零七（公里），掟彎又唔收油，有個乘客頂唔順，嘔到一車都係！」陳坦言每次乘搭均有「搵命博」之感。
記者分別兩次乘搭44號專線小巴，發現晚上車速高達一百零五公里，日間亦有一百零二公里，儘管車速顯示器不停鳴響，司機卻未有理會。記者致電舉報熱線，接聽來電者竟屬東九龍交通部，但了解過後，又指「嗰條線唔係我哋個分區，即時做唔到，我哋會交畀交通調查組（處理），到時你要同個司機一齊去警署錄口供，之後仲要上庭做證……」
曾乘搭超速44號專線小巴的立法會交通事務委員會委員王國興批評熱線舉報不能治本，「架車真係好快，不過舉報程序咁麻煩，加上（超速）件事都過咗，仲會唔會有人舉報呀？」王認為杜絕小巴超速須從限制車速着手，規定小巴須裝置車速鎖。
口講口賠運輸署捱轟
警方發言人指出，「公共小巴道路安全駕駛計劃」熱線由去年十一月至今年三月下旬期間，共接獲一百六十七宗市民投訴，其中六十九宗涉及超速；計劃推出後，涉及小巴的交通意外及傷亡有輕微下降。
運輸署發言人則稱，過去一年，共接獲七宗有關44號專線小巴超速的投訴，已跟營辦商作適當跟進。發言人說，倘發現小巴司機超速情況嚴重，將影響小巴營辦商的客運營業證續證年期。
對於運輸署的回應，王國興直指向營辦商發警告只是「口講口賠」，「運輸署會話超速嚴重影響評核、年期、投標，但又唔解釋點樣先嚴重到影響投標，咁警告即係得個講字啦！」
一個車速鎖問題全消
小巴超速問題經年未有解決，但原來要從技術上着手不大困難。理工大學機械工程學系工程師盧覺強認為，簡單地加設一個車速鎖已可解決問題，「車速鎖嘅原理係要限制燃油量，只要喺油泵嘅天梯齒度加一粒螺絲，就可以控制到車速。」
香港專業教育學院（李惠利）汽車工程系講師馮敏強則建議，政府可鼓勵小巴營辦商引入已裝設由電腦控制的車速鎖小巴；不過，由於電腦車速鎖屬一整套系統而非個別組件，可待舊式小巴淘汰後才逐步引入。
記者 馮國豪