立法會爆出有男議員如廁後唔洗手，事後個個都誓神劈願話唔係自己，仲聲言要搵出真正嘅「廁所黑手」，係咪賊喊捉賊就唔知嘞，但疑似黑手嘅解釋都幾搞笑。首先促成爆料事件嘅始作俑者陳克勤，尋日爆料畀卓妮聽，話呢隻黑手傳聞已久，出沒於中環政府合署西座四至五樓議員辦事處外廁所，仲話呢位議員慣性洗完手至如廁，完事後無洗手就立即離開。
李永達就話呢位黑手議員有兩個特徵，就係戴眼鏡和頭髮稀疏。要符合呢兩大特徵，其中一個係「大象哥」黃定光，加上佢曾經在開會期間公然用手指尾「挖鑽」鼻孔，於是大家就視佢為目標人物。尋日大象哥極力否認係廁所黑手，仲強調自己好注重個人衞生，否則喺屋企會無晒地位，分分鐘連床位都無埋，意思係老婆唔畀佢上床瞓覺咁解。
好多男人習性都係夠膽做唔夠膽認，如果爆料人唔講，事件最終可能不了了之。有議員歸咎爆料嘅食物及衞生局局長周一鑊爆啲唔爆啲，狠批呢種官員陋習唔要得，理應和盤托出誰是廁所黑手，事關呢件事關乎公眾利益，局長知情不報應該受譴責。
唔單止周一鑊受譴責，商務及經濟發展局副局長蘇錦樑（Greg）都要記黑豬，事關佢尋日在立法會回應旅遊界議員謝偉俊嘅動議時，因為講稿有兩頁紙黐埋咗，搞到佢讀少咗兩頁紙，但議員好似發緊夢咁無發覺有錯，其後阿Greg讀讀吓突然如夢初醒話：「唔好意思，有兩頁紙黐咗！」於是硬着頭皮由頭再讀一次，讀讀吓都忍唔住苦笑，照稿讀就有呢個弊處！