港鐵尋日宣布，昂坪纜車嘅董事總經理張少華將會調返港鐵出任車務營運總管，而當年有份參與九鐵兵變嘅李殷泰，會由七月二十日起接手做昂坪纜車的揸Fit人。
港鐵車務總監麥國琛公布人事調動時，都忍唔住讚張少華過去十八個月喺昂坪嘅工作表現出色。咁又係，昂坪纜車投入服務冇耐就發生飛墮車廂事件，張少華當時臨危受命，在任期間提升纜車嘅表現及可靠性超越百分之九十九，成為全球表現最佳嘅纜車系統之一。佢為咗扭轉纜車喺公眾心目中嘅負面形象，又絞盡腦汁拉埋前商務及經濟發展局局長馬時亨同一班高官試搭纜車，臨走前更推出新噱頭嘅水晶車廂。港鐵方面話，「車務營運總管」呢個位係港鐵為張少華度身訂造嘅，之前根本冇呢個位，依家佢可以調返總部坐鎮，至於佢呢個新位同李殷泰之前做開嘅副車務總監邊個位高啲，港鐵都話講唔到排名，即係唔可以話畀大家知李殷泰係咪被炖冬菇。
至於原本係港鐵副車務總監嘅李殷泰被調任為昂坪纜車董事總經理，港鐵指內地遊客對香港旅遊業影響愈來愈大，李殷泰有經營跨境城際鐵路經驗，對昂坪纜車日後發展有幫助。不過，如果內地市場咁重要，港鐵係咪更加應該留番李殷泰呢個內地通喺總部坐鎮呢？港鐵就話，今次調動係希望管理層接觸唔同層面嘅工作，令佢哋更明白公司嘅發展路向喎。