本文重點
梁展文事件揭示，理應最有政治觸覺嘅問責局長同多名高級政務官，都有意無意咁集體患上「紅灣半島失憶症」，反而負責執行及技術工作嘅行政主任同專業職系官員，就睇到梁展文轉職帶嚟嘅公眾觀感問題，並敢於向上司進諫預警。專業職系出身、出名誠實敢言嘅稅務局局長劉麥懿明，尋日就公開同兩位頂頭上司鬍鬚曾及煲呔曾唱反調，話本港經濟喺本財政年度之內都見唔到會復甦，比雙曾嘅預測遲多一整個季度。公眾到底應該信邊個？相信大家都心裏有數。
煲呔曾早前誇口本港經濟最快會喺今年中開始復甦，依家距離年中剩番唔夠兩個月，唔好話睇唔到任何復甦曙光，連幾時跌到谷底都未見到。煲呔曾愛將鬍鬚曾其後改口話年尾有機會復甦，不過根據佢屢次錯估通脹率同財赤數字嘅往績，真係信佢一成都死得。
市民拖稅破紀錄
究竟本港經濟仲會衰多幾耐呢？身為政府大掌櫃嘅劉太，尋日就喺稅局一年一度嘅稅收情況記者會上話，受金融海嘯衝擊，去年度本港市民同企業一共拖欠庫房超過七十二億元稅款，實際金額打破歷年紀錄。佢仲話，由於經濟喺本財政年度都無望復甦，預計呢個數字來年會再創新高。即係話喺明年三月底財政年度完結前，本港經濟睇怕都復甦無望。
受股市同樓市成交大幅萎縮影響，去年度嘅股票同物業印花稅合計跌咗三成八，預計本年度會再跌多兩成二。不過劉太就否認佢係睇淡今年嘅股市同樓市，強調呢個只係佢哋嘅較保守預測，有關數字年年都會估錯，而且仲係咁多項稅收之中錯得最離譜嘅一項。梗係喇！呢個數根本唔係由劉太作出估計嘅，而係早喺鬍鬚曾發表預算案時公布，證明劉太都唔信得過鬍鬚曾嘅預測，寧願做個誠實大淡友，警告市民做好心理準備，應付呢場金融海嘯持久戰。