人哋話「新官上任三把火」，新上任嘅理大校長唐偉章不僅冇擺「官威」，仲話會聽唔同人嘅意見。唐校長之所以咁開明，皆因佢喺美國任教時已為同事出頭，為亞裔員工爭取晉升機會。唐校長仲話︰「好多嘢係要爭取返來嘅。」
唐校長話喺美國教書嘅時候，知道亞裔同事嘅晉升同表現機會都比白人同事少，其實係因為校方醒唔起無考慮到，於是唐校長就同啲同事組織起嚟，就算有人擔心佢咁樣會影響仕途，佢都冇有怕咁同校方反映，結果學校嘅風氣都有所改變。唐校長自己都咁「激」，唔怪得到佢自己做校長，會咁樂意聽員工嘅意見啦。
唐校長好鍾意行山，去旅行或公幹都會抽時間行吓，可惜佢太太怕畀蚊咬，加上就職後日日嘅工作都係由朝排到晚，所以返香港後已經行少咗，佢尋日就特登約班記者朋友由薄扶林水塘道行到上太平山頂。行完山，唐校長仍然精神奕奕，仲話要返去開會睇吓點應對啲豬流感喎。但佢就話豬流感喺香港都未係好嚴重，唔會強迫啲學生戴口罩。