立法會五散人譚偉豪、陳茂波、陳健波、梁家騮同林大輝做咗九個月新人，喺議會嘅表現愈嚟愈成熟，但係佢哋嫌「五散人」依家呢個花名唔好聽，驚隨時唔散都被人叫到散檔，所以最近萌起正式改名念頭，想學其他政團組織，打正招牌行事。其實，「五散人」改名都好嘅，最緊要唔好叫「五大聚人」就得嘞。
五散人每個禮拜三立法會開會前，都會喺立法會附近嘅中國會一齊食早餐，就唔同議題交換意見，甚至會傾投票立場，隊形實中似散，散中有實，不過佢哋對「五散人」呢個名似乎就唔多受落，嫌個名講到佢哋五個散修修咁款，最近想正正式式改番個名，只可惜好名難求，到依家仍然苦無頭緒。
佢哋五個之間嘅關係，經過大半年磨合，的確係扣得愈嚟愈緊，唔再係佢哋初時聲稱「交流意見」咁簡單。好似最近表決預算案咁，五人都投票支持，已經向聯盟形式甚至小型政團模式又行前一步。
五散人有意改名，大家如果有乜好諗頭，不妨大膽建議，不過，叫「五聚人」就唔好嘞，五個罪人走埋一齊，肯定無好下場。