浸會大學嘅當代中國研究所早前開幕，呢間由前港區全國人大代表薛鳳旋掌舵嘅研究所搵銀能力絕對不能小覷，因為港澳兩地特區政府都有畀生意佢哋做，港澳通殺，其中研究嘅項目，仲包括澳門同珠海喺橫琴島合作開發計劃嘅具體措施添。
「四叔」李兆基係當代中國研究所嘅大水喉之一，捐咗一千萬銀畀研究所做啟動基金，工業界元老陳瑞球亦捐助五百萬銀，浸大校董會主席王英偉話，四叔願意支持當代中國研究所，全因研究所定位清晰，因為浸大呢間研究所喺香港各間大學嘅研究所之中，係極少數專門研究中國國情，而且研究範圍涵蓋政治、經濟、社會同民生各方面。
當代中國研究所啱啱至開幕，但係生意唔少，所長薛鳳旋透露，手頭上有五個研究項目，香港同澳門特區政府都有委託研究所幫手做研究添，澳門嗰兩個項目好有睇頭，除咗橫琴，仲有澳門博彩業日後同其他產業點樣平衡發展；港府嗰兩個，就係金融海嘯後香港宏觀經濟何去何從，同香港與珠三角基建協調。