Ｈ１Ｎ１甲型流感疫情不斷擴大，人人都盡量取消去美國嘅行程，相反，海洋公園保育基金主席陳晴（Judy）為咗出席美國大學師弟師妹嘅畢業禮，拍晒心口出發去當地，而且仲係去最近疫區嘅加州添。
Judy早兩日扮到靚一靚出席海洋公園亞洲動物天地開幕禮，一身白裙配襯火紅Chanel皮帶及紅靴，十分搶鏡。佢仲充當導遊，帶埋關懷熊貓大使黎明四圍參觀。原來佢除咗係海洋公園保育基金主席，亦都係佢喺美國所就讀嘅大學Menlo College校董。
Judy唔經唔覺做咗校董五年，而且應承咗今年喺畢業禮上演講，呢一兩日就會出發到美國。雖然甲型流感正在擴散，佢話唔驚得咁多，現時南加州疫情較嚴重，而佢母校所在嘅北加州，都仍然算安全。既然應承得人哋，就點都唔可以托手㬹，「工作始終都要做，畢業一生人只得一次，點都要支持。」Judy已買定口罩同維他命Ｃ去美國，以備不時之需。至於演講內容，佢都已構思好，打算鼓勵當地大學生喺金融海嘯逆境之中，都要自強不息。