弊弊！財政司司長曾俊華話要去疫症重災區美國同埋加拿大訪問喎，美國已經出現死亡個案嘞，鬍鬚曾會唔會惹上病毒，變咗香港第一個帶菌者㗎？勞煩曾浩輝，財爺返港之後唔該派人同佢由頭到腳裏裏外外徹底消毒，最好跟手隔離一段時間。
弊弊弊！食物及衞生局局長周一嶽話喎，當局會喺未來兩至三個星期，發起全港清潔大行動，喚起市民關注環境衞生。
咦，搞清潔好應該吖，功夫茶點解覺得弊弊弊？當中係有兩大弊因嘅。
第一個弊因，大家都知啦，今次豬流感仲恐怖過沙士，傳播以及殺人嘅速度快得驚人，防疫機制係應該升級，而唔係降格。○三年沙士期間，當時嘅特首董建華以高規格抗疫，委派當時嘅政務司司長曾蔭權做掃街清潔大隊長，即係由香港第二號人物揸掃把。按道理，今次對付殺傷力更勁嘅豬流感，即使唔係由第一號人物御駕親征，起碼都要維持原有規格，神聖嘅掃把應該交畀政務司司長唐英年去揸一揸。點不知，發起全港清潔大行動嘅竟然係比司長低級嘅局長周一嶽，咁咪等於降格囉，橫睇掂睇都係唔啱數。
第二個弊因，大家都見啦，周一嶽有名你叫周一鑊，唔孭鑊唔安樂，醫療醜聞多多，藥物事故頻頻，你畀佢揸掃把搞清潔？好得人驚啫，睇怕瘟疫恐慌要升級嘞。功夫茶強烈呼籲市民，信董太好過信一嶽，洗手洗手洗手！
講番美國有八成半病人冇去過墨西哥呢個問題吖，諗諗吓，真係匪夷所思。外國有傳媒報道，病毒嘅源頭其實係中國，雖然中國衞生部否認，之但係，內地的而且確有隱瞞疫情嘅前科喎。計功夫茶話齋，周一嶽與其揸掃把搞清潔，不如打電話問功課，向京老爺打探一下內情，對於防疫可能更加有幫助。
話時話，唐唐因乜事唔去爭做掃街清潔大隊長呢？家陣負責管理全港樹木好忙咩？斷估唐唐唔使逐棵樹、逐棵樹去檢查啩，更加唔使企喺棵樹下面呆望，睇吓幾時冧落嚟砸死人，呢啲咁愚蠢嘅工作，手下一定有更適當嘅笨蛋去完成。如果功夫茶係唐唐，爭崩頭都要爭贏周一嶽，一於將掃把搶到手，因為曾蔭權當年掃完街之後冇耐，即刻有機會吹住口哨升職，然後入主禮賓府，幾過癮呀。
點都好啦，邊個升職邊個落台暫時都唔係最重要嘅，最最最重要嘅係做好防疫工作。周局長，記住實曾俊華呀！咦，咪住，環境局局長邱騰華又話去咗加拿大訪問，周局長，多件！