政府搵狗仔隊「嘜」實建制派議員守夜為預算案投票，但點知依然走漏眼，畀「金勞詹」詹培忠同「三點不露」快閃夜逃，少咗兩票，只得三十四票支持，變成羞家慘勝。金勞詹尋日爆料，話事後畀人詐型，但佢解釋在投票當晚九點鐘鬆人，全因為「周公」急Call，趕返屋企瞓覺休息好過。
換句話講，金勞詹寧願瞓覺都不願為鬍鬚曾貼金，鬍鬚曾變相輸畀一張床。金勞詹仲振振有詞話，佢早已表態支持預算案，而二讀時亦有投贊成票，所以一啲都唔閃縮，強調應該支持就支持，應該反對就反對，好似政府處理雷曼迷債風波搞到一鑊泡，日後政府都好難叫佢支持發行債券囉！
金勞詹講完自己嗰筆，話鋒一轉搵自由黨做擋箭牌，話當晚自由黨三票全投支持預算案，先至起到政府夠票嘅關鍵作用：「張宇人廿幾萬人工一個月，佢收邊個人工呀？劉健儀係全國人大代表……方剛又靠邊個呀？只有我哋呢啲唔使靠人，先至可以自出自入咁逍遙啫！」
其實政府一早已經穩握足夠嘅票數通過預算案，據講只係鬍鬚曾唔想贊成票少過當年嘅梁錦松，結果死箍爛箍，逼到建制派議員要留守到最後一刻，難為勞聯李鳳英要棟支拐杖返立法會投票，點知原來有人可以印印腳鬆人返屋企大覺瞓，話說回來，鬍鬚曾嘅箍票功力似乎真係唔多夠噃！