食物及衞生局局長周一鑊出名反應遲鈍，做乜都慢人幾拍。尋日立法會恢復二讀食物回收法時，各黨派議員都支持立法，但就批評來得太遲，其中李華明自誇早喺十年前，已經促請政府訂立相關法例，偏偏周一鑊要等到香港爆發三聚氰胺大恐慌時，先至識得匆匆立法補鑊。
工聯會嘅王國興比李華明更加誇張，佢話自己早喺九五年香港發現有異味奶品嘅時候，已經喺當年嘅市政局提議立法，比李華明仲要早多四年。說話期間佢仲特別展示出一本由佢喺九八年撰寫、名為《市政興革》嘅書，裏面記載咗當年佢喺市政局嘅工作同發言，證明自己唔係馬後炮亂咁去邀功！
