本文重點
經濟差又遇着豬流感，真係黑開有條路，港人心情都大打折扣，不過戲院生意就不跌反升。有電影及影視產品發行界一姐之稱嘅角川洲立集團主席黎筱娉，尋日出席亞視嘅影碟發行活動時話，經濟蕭條，反而多咗人入戲院買歡樂，喺美國嘅戲院生意就升咗十幾個巴仙。
卓妮見到黎姑娘，第一時間捉住佢問吓戲院有乜措施預防豬流感，佢話當年沙士對戲院嘅打擊仍然歷歷在目，今次又來一場豬流感，點都唔敢掉以輕心，會密切留意疫情，做足防疫措施。
不過，黎姑娘慨嘆經濟不景氣下，戲院租金未有下調趨勢，惟有諗計開源，引入「一場地多用途概念」，喺部分戲院旁邊開設餐廳外，更將戲院豪裝成結婚場地，租畀新人舉行婚禮或拍攝婚紗照，實行地盡其用。
阿石做粵劇「評審員」
同場仲有前立法會議員劉千石，阿石現身撐場，皆因其中一套發行影碟就係專訪佢。
阿石一向係超級粵劇迷，同粵劇名伶白雪仙老友鬼鬼，佢經常走訪戲班睇戲之餘，仲做埋「評審員」，畀意見班主將套戲由四粒鐘縮短到三粒鐘，話咁樣先可以吸引更多新觀眾喎。佢又四出拉身邊老友入場睇粵劇，但就堅持唔會派飛，因為唔想寵壞觀眾。
卓妮