本文重點
真正鍾意去旅行嘅人，都唔想同啲三唔識七或者品味唔同嘅團友一齊外遊，以免被迫嘥時間去埋啲自己冇興趣嘅景點，但立法會嚟緊就會搞個咁嘅內地訪問團，令部分團友大呻冇癮。有議員估計係中央唔想泛民主派議員做訪問團團長，或者刻意幫某啲人提升民望，先至迫使立法會搞盲婚啞嫁，將兩個南轅北轍嘅內訪團二合為一。
中央當年為爭取立法會通過政改方案同四川重建撥款，先後破例批准立法會組團訪問內地，多名冇回鄉證嘅泛民議員都可以成行；不過新一屆立法會組成後，環境事務委員會要求訪問珠三角商討兩地嘅環保合作，內地當局又以事忙為由兩度婉拒。
七一前出招降溫
最近煲呔曾同整個特區政府嘅民望急跌，大家都
住七一會有幾多市民上街，中央惟有再出招降溫，再次畀立法會喺下月中組團到內地訪問，營造和諧氣氛。奇就奇在內地竟然主動提出，將率先要求到訪嘅環委會訪問團，同之後先提出申請嘅經濟事務委員會訪問團二合為一，並改由與環保同經濟都冇乜關係嘅立法會主席做團長，兩個委員會嘅主席反而連副團長都冇得做。
有泛民議員質疑有關安排，覺得係有人唔想本身來自泛民嘅環委會主席余若薇（Audrey）做團長。Audrey唔想揣測當中有乜政治考慮，但就覺得兩個委員會一個想睇珠三角嘅環保設施，一個想睇物流同旅遊基建，好難編排行程。經委會主席林健鋒就唔係咁睇，佢話經濟發展同環保都係息息相關，睇唔到有乜衝突；又話唔介意畀人搶p:咗團長個位，認真抵得諗！
最離譜係煲呔曾揀正喺立法會公布有關消息嘅同一時間，無喇喇又自爆希望再率領立法會訪問四川，同立法會主席爭出位搶曝光，一於有彩就攞盡，唔怕面懵！