立法會新丁陳克勤今個月底生日，呢個係佢殺入議會後開啟人生新一頁嘅第一個牛一，梗係要隆重其事啦，尋日搵埋另一位議會新丁、上個月啱啱過咗三十五歲生日嘅李慧琼（Starry）一齊吹生日蠟燭。
克勤仔同Starry嘅生日Party，本來打算回歸童真，幫襯快餐店，後來佢哋嘅助理建議改為喺涼浸浸嘅雪糕店搞，吸引到一班年輕黨友同記者畀面捧場。吹完蠟燭，佢哋無透露生日願望，不過做開環保政策嘅克勤話，佢計劃聯絡環保團體，成立一支全民查樹隊，仲會搵學生做小義工，由環團教授樹木知識，咁啲學生平時行街時就可以見樹查樹，發現問題就即時舉報，避免再有塌樹慘劇事件。
至於關注連串金融事件嘅Starry就話，打算喺今個月內成立一個小投資者聯盟，頭炮向政府建議撥啲印花稅出嚟，喺將來成立嘅財經事務申訴專員下整番個基金，用嚟畀小投資者訴訟。既然佢兩個都咁有諗頭，但做唔做得成，就要睇落去至知。既然係慶祝生日，就祝佢哋願望成真啦！