呢個昏君從一眾婀娜多姿嘅妖艷妃嬪群中，嗖一聲跳咗出嚟，拔出削鐵如泥嘅寶刀，一嘢斬咗大臣個頭，然後，嗖一聲又跳番入去香噴噴嘅女人堆。昏君對佢嘅妃嬪咁樣講：「呢條瞀里咒我大禍臨頭，無風起浪搞搞震，我殺咗佢，咁咪乜事都冇囉！美人，我哋繼續玩剝衫大話骰，三個六……」
呢嗱嗱嗱，食衞局局長周一嶽似足呢個昏君。《東方日報》以及《太陽報》年幾之前已經報道過，深圳有人將未經檢疫又不明來歷嘅蔬菜，利用假證掩飾，大量走私來港。哈，周局長一直充耳不聞。跟住，本港蔬菜運輸業界不滿「假證菜」搶晒佢哋嘅飯碗，一次又一次向食衞局反映。哈，周局長居然含血噴人咁話「有人製造事端」喎。
即係咁，不斷有人警告周一嶽，疑似毒菜兵臨城下嘞，快啲堅守城池啦。周局長一於埋首沙堆扮鴕鳥，乜都睇唔到，乜都聽唔見，仲要屈人食死貓，誣衊業界報假案。
終於，蔬菜運輸工人忍無可忍，前晚駛出幾十架運菜貨車，全面堵塞文錦渡來回路段，要求政府解釋。滿腔怒火嘅工人仲話，如果兩星期後得唔到令人滿意嘅答覆，將會發起更激烈嘅抗議行動。另外，又有立法會議員助理目擊整個走私過程，證據確鑿，不容抵賴。
搞到咁大鑊，賴無可賴嘅周一嶽，先至肯將自己個頭從沙堆之中掹番出嚟。成頭沙嘅佢話喎，近期確係發現有假來源證嘅蔬菜來港，不過，由於一國兩制，所以要交由內地徹查，香港口岸會加強檢查。
唉，昏君即係昏君，成件事擾攘咗年幾嘞，唔知幾多噸假證菜已經食晒落香港人嘅肚，周一嶽家陣先至如夢初醒。功夫茶有少少唔明，特區政府係咪餐餐都要激到市民爆肺，要出到堵塞交通呢一招，先至肯面對現實嘅呢？
假證菜存在兩大問題，第一個問題梗係未經檢疫啦，隨時有毒。至於第二個問題咯喎，蔬菜運輸業界已經好大聲咁樣表達咗出嚟嘞，運輸工人本來每月收入有一萬蚊，家陣受到假證菜蠶食，跌至五、六千。喂，再係咁搞落去，運輸工人失業都似，到時怨氣更大，堵塞交通可能唔止文錦渡。上次試過有不滿油價太貴嘅司機癱瘓中環啦，周局長係咪想玩多鋪先？
計功夫茶話齋，香港蔬菜同業聯會副會長王正強鬧得有道理，佢怒斥周一嶽所講嘅「有人製造事端」係屈業界食死貓，所以佢話：「既然我哋冇錯，佢係咪應該向業界道歉？」
鴕鳥局長，認衰啦，道歉啦，今時今日冇可能拔出削鐵如泥嘅寶刀，斬晒所有人嘅頭㗎喇！