本文重點
兩年前嘅一場選舉，梁家傑挑戰煲呔曾，一鳴驚人，雖然最終都選輸咗，不過袋巾梁一直好留意煲呔曾嘅表現，可以講係好密切嘅監察，佢尋日仲拎番煲呔曾嘅「我的施政綱領」出嚟，點評佢呢兩年嘅表現。
煲呔曾份政綱分五部分同四十五項，袋巾梁逐一圈點，其中二十三項係打交叉、另外一剔一點同埋剔嘅分別只有十一項，即係話超過一半嘅政綱都係做唔到，即係唔合格。
煲呔曾最差政治經濟
根據袋巾梁嘅點評，煲呔曾做得最差嗰兩項分別係經濟同政治，一個剔都無，同交白卷無分別。政綱提到主動聽取民意同檢討三司十二局咁，袋巾梁就批評班獲委任嘅副局政助有表現嘅寥寥可數，有啲唔知為咩入去，質疑「係咪多一層保護膜、隔火牆令煲呔曾安全啲」，直情係一大敗筆。
政綱仲講到要鞏固香港作為國際金融中心地位、維持地區物流航運樞紐地位咁，袋巾梁話前者已經受上海挑戰、後者喺三通之後，更加係「癡人說夢、無得搞」。袋巾梁話香港喺金融中心方面仲有好多優勢，好似健全法制同資訊流通咁，不過已經有唔少財經界朋友同佢投訴，話政府無為香港爭取過。