香港刮起一股退休高官炮轟港府風潮，遠有「鐵蝴蝶」任關佩英、「平叔」王永平、同埋回歸前位至副布政司嘅馬會主席陳祖澤，近有尋日正式卸任申訴專員嘅戴婉瑩，個個見義勇為，批評政府無面畀。做過保安局局長、九八年退休嘅黎慶寧，前日記者叫佢評價一下港府施政，佢嘅答案好玄，話「無嘢講」，唔鬧，更加唔似讚。
夠膽狠批港府施政嘅前高官，啱啱夠腳開一枱麻雀。以港府嘅差勁施政，呢枱有火高官雀局嚟緊肯定會凸腳，爭在新雀友係邊一個啫，黎慶寧前日以顧問身份出席智經研究中心成立三周年酒會，即刻成為記者追問對象。
黎慶寧身材瘦削，有骨精強外號，前日見佢肥番啲，面上多番啲肉，人都精神咗。記者問黎慶寧，會唔會學其他退休高官咁批評港府施政，佢急忙打哈哈，話：「你哋有冇見過我講嘢吖？」記者追問佢點解唔講嘢，佢拋低一句：「我無嘢講吖嘛！」就走咗去。通常我哋對一個人或一件事好失望，無乜寄望，會話「無嘢好講」，黎慶寧話「無嘢講」，係乜意思，佢自己先至知嘞。