立法會議員張文光早前好心幫黨友助選，卻相當黑仔被捲入非禮事件，警方邀請佢返田心警署協助調查，後來差人仲送咗個橙畀佢。不過張文光唔明白個橙上面點解有張印咗號碼嘅貼紙，「唔通呢個係入冊號碼？」
雖然大家都唔信張文光係鹹豬手，但佢就因為呢件事畀立法會班同事、政府高官笑到面都黃埋。張文光見過鬼都怕黑，佢話依家去親女性多嘅場合都會好小心，盡量翹埋對手，而且入電梯一多人都會即刻醒水退後幾步，避免不必要嘅身體接觸。張文光仲話，大家最關心嘅依然係點解佢當日離開警署時，手上有個橙，就連佢個女嘅同學都不停追問，搞到佢都唔知好嬲定好笑。
講番個橙上面懷疑係入冊老冧嘅編號，張文光記得係四位數，係四零甚麼。查實嗰個貼紙叫做PLU code，係北美洲新鮮農作物要嚟定價用嘅，好似新奇士橙，喺香港買得到嘅主要有3108同4012，其中4012嘅橙較大，一箱大概有五十六個，而且冇核。即係話嗰日差人送畀張文光嗰個四字頭嘅橙，係好嘢嚟㗎。