新一代數碼相機科技愈來愈先進，就算做「傻瓜」都可以得心應手，相對菲林市場逐漸萎縮，只剩番少數比較執着嘅發燒友玩菲林攝影。富士攝影器材以前賣菲林賺大錢，但係已經今非昔比，富士主席孫大倫前日出席一個公開活動時，講得好坦白，佢話香港菲林市場萎縮得好緊要，唔單止普通相機菲林唔賣得，就連電影菲林都無咗成一半生意，主要原因係有一半港產電影北移到內地拍攝，好自然會幫襯內地買菲林啦！
不過，香港菲林唔賣得，並不代表全世界都係咁，孫大倫話，好似富士日本總公司嘅電影菲林銷情，就非常理想，淨係做印度Bollywood嘅生意已經唔憂做，皆因印度電影業非常蓬勃，年產大約一千二百部電影，每年營業額近一百億港元，所以用菲林之多，可想而知，相比香港真係望塵莫及。孫博士無奈話，菲林萎縮係大勢所趨，諗唔到有乜對策喎，惟有想辦法做好啲盤生意囉！