本文重點
立法會議員連環粗口問候高官，惹來連串風波，直到尋日辯論財政預算案仍然議論紛紛，成件事又令人諗起，煲呔曾都曾經喺立法會講過粗口。「3L」議員林健鋒（Jeffrey）就好老實話，十個男人有九個都會講粗口，但最重要係睇清楚乜嘢場合，而專業會議劉秀成就建議用代詞代替粗口，例如喺議事堂出現嘅粗口，就可以用「PK」代替。
林健鋒揀場合爆粗
卓妮尋日到立法會走一趟，在立法會走廊巧遇Jeffrey，佢話好多男人都鍾意講粗口，差在多定少，同埋喺乜場合講，好似摸住酒杯底，一邊歎雪茄一邊睇波，加啲助語詞就梗有㗎啦，就連佢本人亦不例外，但最重要有兩大原則，就係唔可以在公眾場合講粗口，費事教壞人，其次係當有女士同小朋友在場時，就更加唔講得嘞！
劉秀成就自誇乜嘢粗口都識，皆因細個讀過男校喇沙和聖保羅，呢啲名校嘅學生古靈精怪，講粗口完全唔奇。佢諗起細個時經常用廣東話式英文整蠱人，例如「come mud mix」，大家估吓代表乜？原來係「出嚟撈」咁解，至於廣東話諧音嘅英文粗口，就唔方便講出嚟嘞！劉秀成又話，其實粗口可以用其他字代替，但強調講粗口始終唔係幾好，尤其喺公開場合，費事教壞細路喇。
喺尋日嘅立法會會議，又有議員講「×街」，立法會主席可能有備而戰，即刻以呢啲唔係議會用語為理由，勒令議員收口，而且呢個係主席裁決，不能反駁，件事好快就平息咗。
卓妮