本文重點
財政司司長鬍鬚曾喺去年立法會辯論預算案時玩失蹤，大部分時間都冇留喺會議廳聽議員發言，差啲搞到畀立法會公開譴責，不過由於佢去年狂派千億公帑收買人心，最後份預算案都喺驚濤駭浪下通過咗。尋日立法會開始辯論本年度嘅預算案時，鬍鬚曾就吸取教訓，扮晒乖仔咁幾乎由頭坐到尾，淨係喺中午去咗食飯同下午去咗兩次廁所，雖然佢間中亦有瞌吓眼瞓，但總算係好過上年。
不過咁都唔代表今年份預算案可以順利通過，因為當中嘅措施實在太過垃圾，紓解民困就杯水車薪，創就業又吹水篤數，不但唔少建制派議員謀密倒戈作反，似乎連個天都睇唔過眼要玩埋佢一份。至今最少有兩名建制派議員因事被迫缺席投票，令預算案又少多兩張贊成票，隨時唔夠過半數票通過，憲制危機一觸即發。
第一個要缺席投票嘅建制派議員係工聯會理事長黃國健（KK），原來預算案投票當日（本月廿二日），咁啱係佢喺澳洲讀書嘅囝囝嘅畢業大日子。佢作為爸爸嘅，當然唔可以唔飛去撐場，否則老婆會同佢離婚都似。佢晨早已經訂晒機票同酒店，亦事先通知咗政府，就算個天冧落嚟都唔會取消行程留港投票。
另一個失蹤議員係民建聯嘅黃容根，早前佢右邊膝頭做過手術，足足休養咗成兩個星期，依家輪到左邊，咁啱約咗喺廿一日開刀，廿二日肯定返唔到嚟投票。問佢會喺私立定係公立醫院做，佢都唔肯多講，以免有人會向醫院施壓延遲手術。佢又話就算手術要改期，佢都寧願去游水唔返嚟投票，可見佢骨子裏係幾咁不滿份預算案。
英姐復工增否決機會？
鬍鬚曾想佢出現嘅就玩失蹤，想佢失蹤嘅就偏偏要現身。之前喺立法會跌傷盆骨嘅勞聯李鳳英，尋日坐住輪椅都要返嚟立法會發言，將佢休養期間儲埋儲埋嘅怒氣，一次過大爆發，鬧到鬍鬚曾同成份預算案一文不值。雖然佢最後都冇表明會投乜嘢票，但斷估都係反對或棄權居多。
據聞有官員私下希望英姐休養多兩個禮拜，借傷缺席預算案投票。不過見英姐尋日咁好中氣，廿二日應該可以復工，令預算案被否決嘅機會進一步增加。