牛勢萬鈞 事業運大增
每個人都希望能夠名成利就，因此事業相當重要。不過喺牛年大家嘅事業運究竟係點呢？今日就請嚟梅花易數專家常歡講解一下，只要趨吉避凶，自然可以步步高升、扶搖直上！
大利事業方位
常師傅以九宮飛星為大家解構辛丑牛年有利同影響事業運嘅方位，大家要細心留意喇！
正財位—正西方
九宮飛星當中嘅八白財星，今年飛臨正西方，呢顆星主富貴同有成就嘅意思，打工仔、老細或計劃創業人士，只要利用呢個方位，事業便能有相當唔錯嘅發展。
偏財位—中央位
六白係一顆偏財星，喺辛丑牛年飛臨正中央，如果想今年有意外收入嘅話便要留意。
人緣位—正南方
想事業運暢旺，人緣相當重要，今年一白貪狼星飛臨正南方，此星代表有利人際關係，文昌運唔錯嘅同時，亦會有偏財進帳。
文昌位—正東方
四祿文曲星今年飛臨正東方，主學業、功名、文才、考試、招人緣等，尤其對打工仔嚟講，想升職嘅話，便要留意呢個方位。
喜慶位—東北方
九紫右弼星主吉慶之星，代表有升職、名成利就、財運等喜事嘅意思，今年飛臨東北方，大家記得善用呢個方位。
破財位—西北方
今年七赤破軍星飛臨西北方，此星係顆耗星，有耗費時間、精神、財力等嘅意思，唔想事業上事倍功半嘅話，便要避開它的破壞力。
疾病位—正北方
如果成日病嘅話，真係會影響事業發展，今年嘅二黑巨門星飛臨正北方，主疾病嘅意思，故此要小心呢個方位。
災禍位—東南方
五黃廉貞星若然係中央位有主旺意思，但佢今年飛臨東南方，卻會成為一顆大凶星有主災禍嘅意思，因此要相當謹慎。
是非位—西南方
不論打工仔定老細，最怕就係是非纏身，今年嘅三碧祿存星飛臨西南方，主是非口舌，容易被流言蜚語纏身，令人相當煩惱。
催旺事業風水陣
以前就話喺辦公室擺個催旺事業風水陣，只係家陣大家多咗WFH嘅日子，因此今次就同大家講解吓喺屋企布置幫助到事業嘅風水陣！不過，喺布置風水陣嘅同時，大家要記住要保持地方整潔，唔好堆放雜物同垃圾，亦切忌布滿灰塵，否則會對事業運有影響。
邊個月轉工最行運？
打工仔如果覺得現時所從事嘅行業並唔係咁適合自己，有轉工打算嘅話，常師傅稱可依照生肖嘅六沖呢顆代表轉變嘅星，嚟計算最啱自己轉工嘅月份，而每個生肖最啱轉工嘅農曆月份如下：
生肖 農曆月份
牛 6月
虎 7月
兔 8月
龍 9月
蛇 10月
馬 11月
羊 12月
猴 1月
雞 2月
狗 3月
豬 4月
鼠 5月
邊個月最適宜創業？
如果有計劃創業嘅話，亦可利用六合計算最適合創業嘅農曆月份，因為六合主成功合作嘅意思，創業嚟講自然會較易成功。
生肖 農曆月份
牛 11月
虎 10月
兔 9月
龍 8月
蛇 7月
馬 6月
羊 5月
猴 4月
雞 3月
狗 2月
豬 1月
鼠 12月
撰文：林國豪
攝影：方偉堅
鳴謝：「玲瓏堂」梅花易數專家常歡