慶祝50周年貼身感受《多啦A夢》魅力

講起《多啦A夢》呢套作品,相信無人不識吧!該漫畫於1970年1月在日本開始連載,今年正係50周年大日子,相關產品自然多不勝數,數當中重量級之選,莫過於意大利奢侈品牌GUCCI剛宣布推出聯乘包包,將多啦A夢嘅趣致與奢華品味結合!另外,亦有品牌將多啦A夢與另一夢幻角色Hello Kitty撮合出實用雜貨,仲有真係識得旋轉嘅竹蜻蜓亦啱啱登場,讓粉絲們可隨時貼身感受《多》嘅種種魅力。

貴氣之選!名牌包包可愛結合

女士們愛包包,當中意大利GUCCI絕對係備受追捧嘅品牌之一。啱啱該品牌喺網上舉行咗Epilogue系列嘅發布會,品牌繼之前推出過米奇老鼠及唐老鴨嘅聯乘款式後,今次則有日本國民動漫代表多啦A夢喺GUCCI旗下嘅GG Supreme Canvas包包上現身。只見包包有招牌嘅孖G圖騰配以朱紅色手柄,不過最精彩係有多個唔同表情及甫士嘅多啦A夢圖案,相信令唔少女士一見傾心。價錢及發售日期待定。

網址:https://on.gucci.com/30clgZR

聯手出擊!跟 Hello Kitty出雜貨

喜歡破格及新鮮感嘅朋友,則可以留意人氣日本雜貨店ASOKO最近撮合多啦A夢及Hello Kitty,推出聯名商品ASOKO de DORAEMON HELLO KITTY。相關商品包括餐具、袋、雨傘、杯子、襟章、資料夾等共 53 種,有彩色主題嘅Kazuhiko Ifuku系列,也有黑白色調嘅Buggy系列,不過最正係兩大角色會交換配飾,多啦A夢戴上Hello Kitty嘅蝴蝶結,Hello Kitty則戴上多啦A夢嘅鈴鐺跟竹蜻蜓,非常特別。最重要係價錢唔貴,售價在¥150(約HK$11)至¥700(約HK$52)之間,入貨完全無難度!售賣地點為ASOKO原宿店、ASOKO LaLaPort EXPO CITY店及ASOKO河原町OPA店等6間店舖。

網址:https://bit.ly/2DiiXvk

真係識轉!竹蜻蜓戴上頭

《多啦A夢》眾多法寶當中,竹蜻蜓嘅出場次數可算係名列前茅兼人氣高企,一直以來都推出過唔少相關頭箍產品,不過始終唔夠原汁原味,事關扇葉唔識轉!最近玩具品牌PROPLICA便滿足一眾追求高像真度嘅粉絲願望,推出扇葉識轉嘅竹蜻蜓!只見外觀比例相當不俗,僅需一粒3A電池便可驅動,重點係扇葉旋轉速度唔快亦唔慢,夠晒忠於原著。當然,你唔好以為戴上後可以飛上天,但感受一下戴住竹蜻蜓嘅滋味,或者大熱天時當係風扇為頭頂降降溫依然相當不俗。售價為¥2,500(約HK$185)。

網址:https://tamashii.jp/item/13222

撰文:張超駿 

圖片:互聯網