師情草意：倒果為因
喺超過兩個月嘅社運當中，同好多香港人一樣，我確實感觸良多。一方面為寧可犧牲自己，也要保衞家園嘅義士感到痛惜；另一方面，亦為自己可以見識到至真嘅人性，而覺得感慨。至純潔無私嘅利他行為，固然令人動容；但人性中極醜惡嘅一面，亦確實令我義憤填膺。起初我完全唔明白世界上竟然可以有人毫無良知，同埋同理心，到如此田地。後來，當我慢慢冷靜落嚟，並先大膽假設，人類本性原是善，我就記起我讀書時教授，所講過心理學上嘅認知發展，以及身為醫護人員，不得不留意嘅病者心態，呢兩大要點。首先，簡單啲嚟講，根據皮亞傑（Piaget）教授嘅心理學理論，每個人嘅認知發展係有程度上嘅分別，實驗證實，喺同年齡嘅小朋友當中，的確有部分嘅認知發展係達唔到皮亞傑教授所謂嘅「可以從別人角度看事物」嘅能力，呢啲小朋友，就算將來身體上可以正常發展，但佢哋嘅認知能力發展，卻未必跟上身體成長步伐，而停留喺某個階段。當一個人欠缺從別人角度看事物嘅能力，同理心及同情心，自然較少。亦因為咁，利他行為，對佢哋嚟講，變得難以解讀。而且，一啲邏輯層次較多嘅事情，佢哋可能會需要一啲協助（例如，親身體驗），先會容易明白。
基於呢種認知能力嘅發展，就好容易出現，我喺西藥草課程中，老師提及有唔少病者都會出現「倒果為因」嘅心理現象。究竟喺病者心態上，何謂「倒果為因」呢？其實，有唔少病者，一見到醫護人員，只會向佢哋投訴病癥，如發燒、嘔吐，以及頭痛，有幾咁惱人，幾咁「阻佢搵食」、「阻佢返工」，不停問「點樣可以停止癥狀發生？」，更甚者，甚至會問「係咪可以用啲勁啲嘅藥物，制止癥狀出現，令佢嘅生活回復正軌？」身為醫護工作者，當我哋遇到呢個情況，第一件事，就係要同病者，確定何謂「因」？何謂「果」?「因」（即令癥狀產生嘅元兇，例如：癌症），「果」（即係由元兇引發出嘅現象，例如：發燒、咳嗽，以及肚瀉等，病者口中影響佢「正常生活」嘅癥狀）。如果我哋冇認真咁處理病「因」，只着重禁「果」，不單永遠好唔番，並加速生命了結嘅速度。所以，其實，我哋真係要衷心多謝我哋嘅免疫系統，為我哋打生打死咁「發聲」，令癥狀出現，醫護人員先可以幫我哋對症下藥，搵出病患元兇，無咗佢，我哋真係可以即死！
呢個亦係點解，愛滋病咁難處理嘅原因。
Alice Chan（陳雅詩）
（Reg. Psychologist）香港註冊心理學家
（Chartered Herbalist）加拿大特許西草藥師
M.Sc.（University of London）
High Dip. Pharma Tech.
Email：alice@wherbta.com
Dr. Bonita T.Y. Chan（陳德宜）
Registered Herbalist加拿大安大略省註冊西草藥師
（Nutritionist）營養學家
Ph.D（The Chinese University of Hong Kong）香港中文大學生化博士
前美國Baylor College of Medicine,Texas Medical Centre疾病機理研究員
前美國University of Pittsburgh疾病機理研究員
Email：bonitatychan@wherbta.com
網址：www.facebook.com/wherbta