大黃蜂上身！AR面具睇得又打得
《大黃蜂》日前正式上畫，新一集玩溫馨懷舊，單是大黃蜂用回初代甲蟲車造型，已令變形金剛粉絲感動到噴汁！睇完戲未夠喉的話，孩之寶（Hasbro）還有一大堆玩具畀大家玩，好似大黃蜂頭盔不僅戴得落頭，仲有喇叭播放電影聲效。另一款AR面具，更可透過手機玩盡擴增實境射擊遊戲。當然唔少得可變成甲蟲車的大黃蜂玩具，無論大人細路都啱玩。
頭盔造型跟足電影
大黃蜂頭盔的設計跟足電影造型，雙耳可翻開、雙眼識發光，額前仲有「博派」標誌。最特別是內置喇叭可經藍牙連接手機播歌，同時會隨機播放25條聲效、對白或DJ捽碟聲，讓各位恍如置身電影一樣。
至於AR面具大Sell擴增實境玩法，玩家只要預先於手機安裝《Bee Vision》App，再把3張AR識別卡放於地上，戴上頭盔及手部雷射感應器就可開始遊戲。它用上第一身射擊玩法，敵人會從識別卡浮出，玩家舉手便能射擊或防禦。另一款「武器」是大黃蜂手提槍炮，既射到碟形飛彈，又可變成手裏劍形態，最正是它可解開AR遊戲的特別功能，玩法豐富！
變甲蟲車難度高
今集《大黃蜂》最難能可貴是主角用回Classic甲蟲車造型，跟足電影設計的超能大黃蜂玩具，備有機械人及汽車兩個形態，小記試玩時發覺變形難度頗高，冇說明書的話根本無從入手，花了差不多15分鐘才能成功變形，但好處是可玩性高，變身後也極具甲蟲車神髓。機械人形態則有10.5吋高，滑動胸口齒輪更會發聲發光，備有25款以上聲效及對白，為歷代大黃蜂玩具中少見。
撰文：陳志滔
攝影：郭凱敏
模特兒：Isis Pong
查詢電話：2738 8300