黑鯊Helo加手柄電競更搶鏡

近期電競手機市場勁熱鬧，Razer Phone 2、ASUS ROG Phone排住隊開賣，由小米投資的黑鯊科技亦在年尾推出第2代黑鯊遊戲手機Helo，6.01吋屏幕更大更靚之餘，還引進雙液冷分區散熱及幻彩燈效機身，配合附送的專用手柄，打機未贏人已先贏陣！

黑鯊遊戲手機Helo的專用手柄兼容《PUBG Mobile》，已設定開槍、瞄準等按鍵。售價：$4,180（8GB RAM＋128GB ROM）

幻彩燈添氣氛

打機除了靠實力，台型都好重要，所以黑鯊Helo採用流線型機身設計，背部以3D鯊魚紋玻璃材質，加入閃燈Logo及1,680萬色幻彩側燈，當打機時燈光會隨着遊戲而變化，開Game一刻已搶晒鏡。屏幕則由上代5.99吋微增至6.01吋，最吸引是面板由LCD升級至AMOLED，並支援HDR顯示，美中不足是上下兩條黑邊頗為突兀。

遊戲防沉迷功能

針對打機應用，新機除了保留Shark Key，一按即可提升速度並啟動勿擾模式，還加入雙超線性喇叭及機側懸浮天線，藉此提升音效及信號接收能力。此外，新機增設Gamer Studio，無論處理器、觸控、音效、網絡等設定都可調校，打機自然得心應手。值得一提，新機引進加入「遊戲防沉迷」功能，可鎖定打機時間、作出超時提醒等，避免各位打機玩到廢寢忘餐。

用戶可校正手柄及自訂按鍵功能，設計周到。

配備機背閃燈Logo及1,680萬色幻彩側燈，燈光會隨遊戲而變化。

左側設有快捷鍵，推一下即可進入「Shark」打機模式。

手柄操控簡便

硬件方面則用上Snapdragon 845處理器，提供6GB、8GB或10GB RAM版本，今次水貨抵港的8GB RAM版，於《AnTuTu》測試有逾29萬分，成績名列前茅。小記試玩《PUBG Mobile》時，遊戲能以高畫質流暢進行，最正是附送的專用手柄，提供搖桿、方向鍵及頂部實體鍵，已默認作「食雞」的開槍、瞄準等功能，大大提升遊戲操控性；加上機身植入雙液冷排熱管及分區散熱技術，玩幾耐都唔怕過熱問題。