旅遊KOL推介！ 日台韓地道Apps
3月底嘅復活節長假就快到，無論你係連放4天紅假抑或打算「請3放10」，相信早已計劃外遊輕鬆一下。當中日本、台灣、韓國可說是港人最愛的旅遊熱點，想自由行玩得地道的話，齋上網梗係唔夠，今次搵嚟3位日台韓旅遊KOL（Key Opinion Leader），分享當地實用嘅免費手機Apps，無論搵路搵車、溝通對話都幫到手，出發前記得「單撈」呀！
日本
日本旅遊博客Pace Cheng曾推出多本旅遊工具書，還開設「日本自遊易」面書專頁，有逾26萬粉絲支持。
《Jorudan乘換案內》搭車必備
為人熟悉的日本鐵路資訊App，支援JR、私鐵、地下鐵等當地交通工具，班次、車費、時間等一目了然。好處係資料實時更新，遇到延誤或事故等會立即顯示，而且班次時間極之準確，介面簡潔易用。若各位唔識日文，以漢字或英文搜尋都冇問題。
平台：Android、iOS
《ロケスマ》搵舖神器
此App的英文名為LocaSmart（Location Smart），可說是一個萬能「搵舖」工具，它能因應各人需要搜尋附近的店舖和設施，例如加油站、超級市場、便利店、Cafe、網吧，甚至警署、公園等，分門別類，並會顯示目的地與所在地距離，比Google Maps詳細得多。
平台：Android、iOS
《Jspeak》中日翻譯
由日本政府與電訊商DoCoMo共同開發的半官方旅遊程式，主打翻譯功能，可以語音翻譯英文、中文、韓文、西班牙文等10種語言至日語；另提供會話集，提供交通、觀光、餐飲等常用語句。中日翻譯內容雖然唔算詳細，但簡單字詞準確度都幾高，遊日就唔怕雞同鴨講。
平台：Android、iOS
《Yurekuru Call》地震通知
出門旅遊最緊要係出入平安，《Yurekuru Call》其實只得一個功能，就係實時顯示日本全國地震情況，並作推送通知。同時會記錄地震時間、位置、強度等資料，並有地震應變等內容，宜出發前下載以策萬全。
平台：Android、iOS
台灣
旅遊博客及科技達人石先生，個人博客瀏覽量逾1,100萬，提供不少旅遊貼士和「懶人包」。
《生活行VoiceGO》資訊豐富
介面雖然設計簡陋，但提供的台灣資訊非常多，包括航班、捷運、公車等交通資訊，或者消閒類別嘅電影場次、電視節目表等；連股價油價甚至星座運程都有埋，簡直係諗到嘅、用到嘅統統有齊，非常多元化。
平台：Android、iOS
《Bus+》全台公車
人在台灣，想去唔同地方遊覽，好多人會乘搭捷運或火車，但大部分偏遠景點都只能靠公車直達，《Bus+》就幫到手。它提供台北、花蓮、台中、台南等公車資訊，各位只要輸入地點、路線或號碼就搵得到。另備有附近站牌、到站通知等貼心功能。
平台：Android、iOS
《EZTABLE簡單桌》尋找美食
台灣出名多美食，當地仲有好多夜市、攤檔和餐廳。《EZTABLE》其實在泰國、印尼、香港都有提供服務，當中喺台灣最受用家歡迎。App內有不少排行榜、專題美食等資料，用家更可經App訂位兼享用折扣，一舉兩得。
平台：Android、iOS
《台灣高鐵T Express行動購票服務》靠App入閘
想由台北玩到台中或台南，搭高鐵就最方便。這個由台灣高鐵公司推出的官方App，可查詢高鐵班次及透過信用卡購票。最吸引是外國遊客都用到，買票後更可以用App入閘，非常方便。
平台：Android、iOS
韓國
Karen嘉嘉「哈韓」15年以上，正職為劇場編劇及演員，為感受韓國生活及文化，現居於韓國。
《Interpark》韓迷追星
想去韓國追星睇演唱會的話，一定要下載《Interpark》。它可說是一個官方票務中心，除了演唱會，亦有音樂劇、話劇，或者運動會、展覽等門票出售。鍾意K-pop活動嘅韓迷，睇啱場次再上Global官網或搵韓國朋友幫手買飛就搞掂。
平台：Android、iOS
《韓巢韓國地圖》簡體中文化
去韓國旅遊最怕睇路牌，皆因佢唔似日本提供漢字，《韓巢韓國地圖》可說是韓國的中文地圖App，雖然只支援簡體中文，但地圖詳細之餘，更設有旅遊資訊。當中最好用係地鐵查詢功能，無論停站次數、轉乘資料、時間和收費等一律有齊。
平台：Android、iOS
《Naver詞典及翻譯器》遊韓溝通
韓國著名搜尋引擎Naver出品的翻譯工具，詞典內置全球33種語言，支援英韓、韓中、中韓等翻譯功能，加上備有今天單詞、韓語會話等實用內容，對於想學習韓文或者遊韓時與人溝通的用家，這App肯定大派用場。
平台：Android、iOS
《KakaoBus》巴士搜尋
韓國軟件開發商Kakao涉足範圍由通訊類的《KakaoTalk》到交通類的《Kakao Taxi》都有齊，當中遊客可裝《KakaoBus》巴士App，提供韓國57個城市實時巴士和各站資訊。用法與香港巴士Apps接近，但各站只有韓文名字，建議計劃行程時先記低巴士號碼。
平台：Android、iOS
撰文：林子聰
部分攝影：胡振文