3大航拍靚景！毛孩同樂步步高陞

新年食咗咁多賀年糕點，趁住年初四係假日，一於同愛犬到郊外活動舒展身心。平日喺公園放狗和影相就試得多，今次帶埋近年熱爆的航拍機，於高空盡覽香港3大靚景，從鳳坑遠眺濕地，到南生圍踩單車，或者漫步大棠草地，一邊放狗一邊航拍，寓意狗年齊齊展翅高飛、步步高陞。

鳳坑屬於簡單易行郊遊路段，全程以平路較多，航拍時適合玩手勢自拍。

鳳坑多景點　航拍鹿頸濕地

初春天氣仲涼涼哋，建議選擇一些簡單易行的郊遊路線，當中鳳坑至谷埔，每逢假日有好多狗主帶同愛犬一齊玩，自駕或坐小巴從雞谷樹下出發，步行約15分鐘可到達鳳坑。若果玩航拍機的話，不僅可拍到船灣郊野公園，甚至乎另一端的鹿頸濕地都影得到。而最值得拍攝的景點，莫過於沙頭角海遠眺深圳對岸，前景是密集的樹林，後景是大海和高樓。谷埔另有一大片草地畀狗狗周圍走，不過此處頗多樹林，因此玩航拍時要注意飛行高度。

從雞谷樹下出發到鳳坑大草地，路程需要15分鐘左右，途經一條長樓梯。

從鳳坑可以影到遠處的深圳對岸，前中後景都有齊，畫面豐富。

航拍時能影到鹿頸濕地，水塘和特色小屋清晰可見。

南生圍踩單車　玩跟隨模式

若果想踩單車行大運兼影相拍片的話，元朗南生圍是不錯選擇。其實去到附近隨處可見近年大熱的共享單車，單車上設有籃子可擺放狗狗；再使用大部分航拍機都支援的跟隨模式，咁就可以一邊踩單車，一邊用航拍機追住自己拍攝特色影片。除了玩跟隨模式，南生圍亦不乏航拍靚景，例如坐在修葺後的婚紗橋從高處俯瞰，或者飛到標誌性的石屋等，甚至可拍到毗連的山貝河及對面的元朗工業邨。

南生圍是踩單車熱點，周圍都可以見到共享單車，適合以跟隨模式玩航拍。

南生圍的景點之一石屋，不少遊人會攀上去，用航拍鳥瞰別具氣氛。

嚟到南生圍必影木橋，連狗狗Depp Depp（左）和黑頭（右）都Like。

大棠郊野公園　鳥瞰元朗市

元朗大棠郊野公園的楓香林以紅葉而聞名，大家2月來到的時候，會看到半紅半綠的樹葉，另有一番風味。大棠郊野公園勝在環境寬敞，又有燒烤場和大草地，好適合大家放狗兼玩航拍。大家只要坐在草地中間，並使用航拍環繞模式，航拍機便會圍住你360度飛行兼拍攝。由於大棠郊野公園的地勢相對較高，因此飛上高空時能夠鳥瞰元朗市及整個郊野公園，呢個時候再用指點飛行模式或預設航點，即可根據所設定的路徑自動飛行，拍攝出特色影片。