Mazda6 GVC 2.0點止入門咁簡單！

廿鬆啲萬就可買到部行政級房車？的而且確，不用$23萬便可以擁有，車身體積長達4.865米，又有皮座、雙區獨立恒溫控制及八安全氣袋，邊部咁抵？說的是Mazda最新的Mazda6 GVC 2.0，可謂蔗渣價錢、燒鵝味道！

台型十足車廂闊落

市場上不是沒有$23萬左右的房車，但是要搵部好似Mazda6咁有台型，設備又有番咁上下水準嘅型號就冇咁易了，Mazda6 GVC 2.0正好演繹出咩叫做抵食夾大件！不論是2.0或2.5公升版本，車身長闊度都是4,865×1,840mm，比起5系及E-Class略短幾cm而已，加上軸距長達2,830mm，空間闊到可讓後座乘客蹺腳坐，還有原廠皮椅及後座冷氣出風口，怎會不爽？除非閣下對歐洲大牌子情有獨鍾，如此高性價比的Mazda6，實在無抗拒的理由，即使是最齊料的Mazda6 2.5 G i-PLUS，售價亦只是$299,990。

尾箱容量十分巨大，實用性不錯。

車廂裝潢帶豪華感，不似入門級車款。

後泊鏡及前後泊車警示皆為標準配備，倒車自然輕鬆過人。

經濟定位不失貴氣

代理最近引進的Mazda6 GVC 2.0，其實就是車系的入門版，主打經濟，且不失貴氣。與2.5公升版比較又少咗啲咩呢？除了引擎容積少0.5L、軨細2吋外，其餘刪減的設備對很多用家而言也是可有可無，如電動天窗、投射式行車資訊顯示屏、電動尾簾及BOSE喇叭等，車價平成7萬元，如果對設備要求唔高，慳番來入油都夠幾年用。Mazda6 GVC 2.0話雖是平價版，但身處車廂卻沒有將貨就價感，前排一雙座椅都有電動調校，駕駛席更另設記憶功能，還有定速巡航、MZD CONNECT多媒體系統、前後泊車警示器、倒車視像系統及附設自動水平調校的LED頭燈等，如果咁都叫齋，都唔知講咩好！

多功能軚盤以皮革包裹，附設藍牙免提及音響操控鍵。

後排加設獨立冷氣送風口，每個角落都有涼風送至。

引擎有出色的燃油效率，每公升油可行駛16.4km。

馬力165ps 輸出線性

引擎容積細咗兩成，馬力只減了27ps，165ps馬力及210Nm扭力的性能雖稱不上出眾，但平日駕駛還是夠有凸，配合SKYACTIV-DRIVE六前速+/-波箱，動力輸出來得十分線性，帶來平穩舒適的駕乘表現。一如CX-5 GVC 2.0，Mazda6 GVC 2.0同樣採用SKYACTIV-G直四引擎，而且有更低的油耗，每公升油可行駛16.4km（NEDC），就算近排油價回升至$15.79/L，計落依然唔使$1/km！同時，尾箱容量亦非常巨大，不但可放進大型行李篋，兩側另設有儲物格，存放雜物自然有更大便利性。中小型車的價錢便可享行政級房車的質素，何樂而不為？