真‧摺機！ Passport認樣玩航拍

近期嘅科技產品興玩認樣，好似iPhone X靠用家嘅Face ID來解鎖。而Hover Camera全新摺疊式航拍機Passport，同樣能夠以面孔識別技術，鎖定用家容貌進行追蹤，仲識得辨識手勢玩盡倒數自拍等功能。最吸引係雙翼內藏四軸螺旋槳，可以似足一本書咁對摺收藏，由內至外都噱頭十足。

自拍時舉起「V字手勢」，Passport就識得倒數拍攝，從此自拍不求人。

「V字手勢」自拍

Passport跟機不設遙控器，皆因它主要經Wi-Fi連接《Hover Camera》手機App操控，內置8種拍攝模式包括主人、飛行、合照、俯角、慢跑、騎乘、環繞和全景供選擇，當中主人模式需事先透過手機鏡頭記錄用家容貌，App會自動將資料上載至航拍機，當用家徒手放機後便能追蹤你個樣，呢個時間只要舉起「V字手勢」，航拍機即啟動倒數3秒自拍，完成後再做「OK手勢」可結束臉部追蹤。當然，App亦提供傳統的虛擬操控桿介面，甚至支援即時編輯影片和相片功能。

Passport槳翼由碳纖面板和邊框包圍，玩落更加安全。售價：$4,098	《Hover Camera》手機App備有8種拍攝模式如環繞、全景可揀。	雖內置32GB儲存空間，不過實際上約只有26GB可用。
主人模式需要先在手機上辨識用家容貌，原理有少少似Face ID。	做出「V字手勢」後，無人機便開始倒數，畀時間你擺甫士。	環繞模式需要事先對準主體點選黃色框，再按開始即會圍繞主體航拍。

對摺設計更慳位

市面大多摺疊式航拍機，都是將軸臂和槳翼摺疊收藏，而Passport的設計大有不同，皆因其槳翼被碳纖面板和邊框完全包裹，令機身猶如一本書般翻開和對摺，摺疊後的體積僅182×132×33mm；而且內有磁石吸實，不會輕易翻開，所以徒手放機都相當安全。起飛時只要開啟引擎，再用手放開機身，它便會透過超聲波和光流感應器進行懸停和定高，因此無論在室內抑或戶外都唔會飄來飄去，只是機身僅重242g，遇上強風難免有點搖晃。而電池續航力只有10分鐘左右，幸好跟機附有兩枚電池以作替換。