德國直擊 Mercedes-AMG GT C Roadster狂野狂轟狂享受

AMG GT家族有多個成員，喜愛無拘束駕駛感的朋友更要留意，皆因車系的開篷旗艦Mercedes-AMG GT C Roadster已到咗香港，早排筆者去咗德國試車，發覺佢唔止有3.7秒破百的實力，更從AMG GT R移植了後軸轉向及電子差速鎖等技術，無論是性能、操控，以至聽覺享受都是Supercar級數！

售價：$2,788,000

軟篷隔音隔熱俱出色

首次接觸到Mercedes-AMG GT C Roadster，感覺是：「使唔使咁惡呀？」鬼面罩用上垂直格柵設計，車體亦較AMG GT Roadster更橫（加闊57mm），望落勁有AMG GT3的影子。現時，廠方提供的車色選擇多達11種，當中更包括型格的啞面車漆，加上軟篷備有黑、紅及米黃色揀，低調定招搖，悉隨尊便。說起軟篷，這個由三層布料製成的車頂，隔音及隔熱都做得好有水準，關篷狀態下，車廂寧靜度跟Coupe版沒太大分別，感覺如同時擁有Roadster及Coupe兩部車，諗起都覺得着數。

中控台上方裝上大型顯示屏，並預載了導航系統。

雙圓形儀錶板中間是彩色顯示屏，資訊清晰易讀。

車廂加上碳纖維裝飾，更見跑格。

揸法不同需時習慣

AMG GT C Roadster的車身闊達1,939mm（未連側鏡），加上長頭冚、駕駛席偏後的布局，若然未習慣睇位便去挑戰黑洞停車場，相信車廠好快會多單噴油生意。部車好難揸？可以咁講，過了適應期、習慣睇位後，操控其實不難，只是需要多一點時間適應而已。再者，AMG GT C Roadster導入了後軸轉向及電子差速鎖，於彎路放膽畀油，極限明顯高於配備機械式差速鎖的AMG GT Roadster，車尾動態亦很受控。筆者認為，AMG GT C Roadster就是那種性情很狂，卻又十分有分寸的猛獸。嫌咁樣唔夠狂野？有料可熄咗ESP，680Nm的扭力全部去晒尾轆，與其擔心太拘束，不如先問自己能否駕馭。不過都要講多次，AMG GT C Roadster的性能，的確唔係講笑！

以開篷跑車而言，行李箱有如此空間已相當不錯。

車側加上V8 BiTurbo的徽章，凸顯高性能身份。

車尾設有電動升降尾翼，有助增加高速行車時下壓力。

Race模式波箱趨賽車化

AMG GT C Roadster的動力核心由4.0公升V8 Biturbo及AMG SPEEDSHIFT DCT七前速波箱組成，557hp的最大馬力僅次於585hp的AMG GT R，扭力帶極為廣闊，高、中、低轉段段有，一下子把油門踩到落底，即時有股無形的推力將身軀緊緊的貼到椅背上，嗰度力超級喪！AMG GT C Roadster的行車模式仲多咗個Race Mode，雙離合器波箱的反應更趨賽車化，排氣聲浪亦更加兇狠，高轉時的咆哮好像天也要塌下來，開住篷怒轟Autobahn，唔爽就呃你嘅。當然，懸掛軟硬都有得調校，不過無論哪一個模式，舒適性都很高，落Track轟又好，作為代步車又好，呢部車都同樣稱職，快又得、慢又得，永遠唔會托(月爭)。

引擎扭力輸出驚人，提供超強加速力。

將行車模式切換至Race，雙離合器波箱的反應更趨賽車化。

放大圖片

AIRSCARF功能無懼寒冬

車廂方面，AMG GT C Roadster走豪華跑格路線，標準內籠已用上Nappa皮革，D形平底軚盤更加上DINAMICA物料，整體質感都在極高水平。原廠另有AMG Performance座椅作選配，不但可為駕駛者提供更多支撐，更首次可加入AIRSCARF及恒溫控制功能，不管外間寒冷或炎夏，都可舒適自在咁開篷駕駛。廠方指，車頂軟篷只需11秒便可完成開/閂，而且是全電動操作，只要車速不高於50km/h，仲可以邊行車邊運作，失驚無神落雨都唔使愁。講咁耐，接近兩球八的車價值唔值？從性能上看，值；論設備及豪華程度，都是值。還欠甚麼呢？Supercar應有的招搖及吸睛度？有，從斯圖加特一直開到慕尼黑，經過鬧市時途人都舉機致敬，連虛榮感都有的時候，畀錢啦老細！