X9s Plus雙鏡自拍玩景深

自拍永遠唔會Out，近年手機的前置鏡頭愈來愈強，不但像素幾何級提升，還引入雙鏡頭設計。內地手機品牌Vivo新推出的X9s Plus便坐擁「2,000萬像素＋500萬像素」雙前置鏡頭，用家自拍時可輕鬆調校景深，配合前置柔光燈及豐富美顏功能，讓男神女神輕鬆影出爆Like靚相。

X9s Plus現於內地開售，定價2,998人民幣，港版預計今年第4季上市。

5.85吋窄邊屏幕

Vivo近年相當積極，繼推出NBA球星Curry特別版手機後，近日發表全新中階機X9s Plus。齋睇外形，它跟上代X9 Plus分別不大，同樣似足iPhone 7 Plus模樣，不過在COS窄邊框技術加持下，左右邊框僅有1.59mm咁窄，屏幕佔機面比例達78.5%，所以放得落更大的5.85吋屏幕。屏幕變大，重量稍增至183.2g亦情有可原，加上邊位尚算圓潤，並支援單手模式，撥號、打字等介面會自動縮小，單手操作尚算靈活。顏色方面有金、玫瑰金及磨沙黑3色選擇，3款的指紋識別器均植入Home掣之內，手指解鎖更方便。

人像雙攝加柔光

廠方的手機向來強調自拍功能，此機亦唔例外，前置2,000萬像素主鏡頭及500萬像素副鏡頭，兩者結合提供「人像雙攝」功能。用家自拍時可自由調校焦點，也可從F0.95至F16隨意切換光圈，藉此營造出不同景深效果。試拍所見，背景虛化都幾明顯，有效突出人像主體，而且對焦儲相速度快；加上此機有齊大眼、磨皮、美白、去油、去眼袋等豐富美顏選項，最正係有埋前置柔光燈，可於自拍時打燈補光，於昏暗環境下一樣影到靚樣。

機背設計簡約，並設有1,600萬像素鏡頭及閃光燈。

前置「2,000萬像素＋500萬像素」雙鏡頭（紅圈示），右邊還加入柔光燈。

用上microUSB充電介面，並保留3.5mm耳機插口。

支援Hi-Fi音色

後置鏡頭則有1,600萬像素，數字上唔算高，但內置DSP圖像處理晶片，可同時拍攝多張RAW格式照片，去蕪存菁後再合而為一。小記拍攝夜景時發覺成像細節豐富，亮度充足，雜訊控制亦處於可接受水平。硬件則用上Snapdragon 653八核心處理器配4GB RAM，屬中階機級數，撥頁開Apps流暢；惟留意自家介面Funtouch OS 3.1都幾大食，連系統安裝後只剩下唔夠2GB RAM畀其他程式，難怪玩大食遊戲時有啲窒啦！特別一提，此機配備ES9318獨立音效晶片，支援Hi-Fi音色，無論睇片或聽歌的高低音均衡度不俗，比不少手機耐聽。

可插入兩張nanoSIM卡，但卡槽並不兼容microSD卡。	Funtouch OS 3.1提供不同主題、桌布及字體供選擇。	系統都幾大食，開機後4GB RAM僅餘下1.81GB可用。
影完相後可加入貼紙及濾鏡效果，選項相當多。	試相區「人像雙攝」功能可虛化背景，令主體更突出，並可調校景深效果。	試拍夜景時亮度充足，暗位層次亦見不俗，而且雜訊不算明顯。