Honda CR-V Turbo進取有偈

本田（Honda）去年底在美國底特律發表的全新第5代CR-V，話咁快就到咗香港，不過代理叫價相當進取，預展價都要近$35萬，點解咁有信心？無咩嘅，1.5公升Turbo的SUV有AWD，仲要係七座位，市場上根本搵唔到多一部，加上豪華設備一大堆，咁嘅售價，冇乜點收貴你（口架）喇！

Honda CR-V Turbo
預展優惠價：$349,880

1.5公升Turbo四驅吸引

1.5公升車在本港有不少捧場客，假設兩部車嘅外觀、設備及馬力完全相同，一部是1.5公升Turbo、另一部是2.5公升NA，相信大部分港人都會揀前者。仲記得兩年前Honda引進的1.5公升Turbo StepWGN，當時嘅氣勢幾咁一時無兩，據講訂單多到車都交唔切，本田首創的「Waku Waku」尾門毫無疑問是正嘢，但爆賣的關鍵，某程度上都是拜「1.5公升」這個心理關口所賜。CR-V Turbo能否重現當年StepWGN嘅勢？平心而論，客觀條件上沒這麼容易，始終SUV選擇多，不似得MPV般狹窄，不過其獨有的1.5公升Turbo七座AWD設定，又似乎可吸引到一班本來對七座需求不大，但又貪心要多兩個位嘅客人。實際有幾多呢啲客？車行朋友話都幾多吓。

車廂布局以黑色為主，並且有木紋飾條作點綴。

打左燈時，車身左側畫面會顯示在中控台屏幕上。

駕駛席設有8向電動調校，並附設位置記憶功能。

Honda LaneWatch監測左方

近年不少輸港的日本車，個Spec都非常高，如果只是鬥設備，很多歐洲名牌皆要比下去，加上日本車的設計大多以人為本，不多不少也解釋了為何歐日車價大幅拉近，仍有那麼多人買日本車。試車當日，發現新CR-V Turbo多咗個叫「Honda LaneWatch」的系統，整合於左側鏡下方的廣角鏡頭，能拍攝到傳統反射式側鏡未能覆蓋的區域，打左燈時，車身左側景象便會即時顯示在中控台屏幕，有助消除左方的盲點位，泊車時又可望住條地線或路壆，為駕駛帶來不少便利性。另一方面，CR-V Turbo還導入了「Walk Away Auto Lock」功能，當遙控器離開車身2.5米，汽車便會自動鎖上，啱晒啲成日唔記得鎖車嘅大頭蝦車主。

導航語音支援粵語、普通話及英語，而且導引清晰。

車頂設有大天幕，使車廂更開揚光猛。

中排設有2個USB埠，方便乘客為手機充電。

預載導航支援3種語言

或者有人會問，1.5公升Turbo推部七座四驅SUV夠唔夠力？先看數據，CR-V Turbo有193匹馬力、243Nm扭力，其實跟搭配2.5公升NA引擎的同級對手沒大分別，揸落感覺仲要爽一啲，尤其是低轉表現，唔使猛踩油門已好肯去，惟稍嫌胎肚肥咗啲（原廠配胎為235/65 R17），過起伏路面的確較舒適，不過就削弱了路感，可謂有辣有唔辣。其餘的標準設備都幾齊，當中包括全LED頭尾燈、電尾門、駕駛席記憶電動座椅及數碼錶板等，而預載的導航不但支援粵語、普通話及英語，資訊更會同步在數碼錶板上顯示，幾時轉彎都一清二楚，唔使吓吓要靠Google Maps，加上前、中、後三排都設有獨立送風口，係咪好細心先？

後排可坐2名成年人，空間中規中矩。	導航資訊會同步在數碼錶板上顯示，幾時轉彎都一清二楚。	引擎容積只有1.5公升，馬力卻高達193匹。
前中後三排都有冷氣送風口，確保每個角落有涼風送至。	放下後座椅背，可騰出更大載物空間。	1.5公升Turbo的SUV有AWD，仲要係七座位，預展價近$35萬都算吸引。