夏日樂逍遙 濕身BBQ

充氣滑梯夠刺激

去燒烤場舉行下水禮？你冇睇錯，當燒雞翼燒到熱辣辣時，場地另一邊空地就添置了10款巨型滑水梯，讓你即刻跳落水消暑降溫。這個充氣水上樂園去年首辦即大受歡迎，今年再下一城增設4條高達8.5米的全新滑水梯，夠晒刺激好玩，而且水深只得1米，大人與小朋友都可以放心玩個暢快。由於只屬暑假限定，8月僅於5、6、12及13日開放（水上樂園共分4個時段，每節2小時，收費由$180至$240，連玩3節則$420，大小同價），想在水中玩跳彈床、波波池及撐船仔就要把握機會。

水上樂園共有10組充氣玩意，嫌瀡滑梯太刺激，香蕉船就比較適合小朋友。

單是滑水梯已有多款選擇，雖然水深只得1米，但會由頭濕到落腳，記得帶衫替換。

歎住冷氣燒嘢食

雖然位於同一場地，不過燒烤場與充氣水上樂園分開收費，就算三代同堂一齊來消遣，長輩都可以選擇留在獨立屋歎住冷氣自得其樂。這兒除了有蓋燒烤場之外，另設有多間海景獨立屋，燒烤爐就放置在屋前空地，打風落雨都毋須改期，鍾意就走到外面BBQ，嫌熱則留在屋內唱K、睇碟、打麻雀、玩UNO等等，各自各精彩。

講到尾也是燒烤場，食物質素當然不容忽視。客人可以先在網上預訂乳豬及套餐，也可即時點叫美國龍蝦尾、蒜蓉帶子、翡翠螺、烏頭、沙白、澳洲M5和牛、安格斯肉眼等數十款食物，比普通燒烤包的腸仔、雞翼、豬扒講究得多。有得食有得玩，大熱天時BBQ一樣皆大歡喜。

燒烤場有數十款食物供應，包括原隻乳豬、美國龍蝦尾、澳洲M5和牛等，一定食得滿足。

金牌乳豬每隻$680，必須早3天預訂，燒到尾聲就可以享用皮脆肉嫩的燒豬。

獨立燒烤屋不但有冷氣開放，更有電視、DVD機、麻雀、UNO等玩意，讓小朋友歎住冷氣燒嘢食。	除了玩水之外，掟飛鏢也是父子之間有趣的親子活動。	室外設有坐擁無敵海景的大草地，小朋友可以在這裏跑跑跳跳及放風箏，幾輛古董車與胡桃夾子公仔也是拍照景點。

白石燒烤

查詢電話：2744 8188

撰文：楊雅菁

部分攝影：張群生

模特兒：Chipoh、Ellen、Jake、Tracy