Volkswagen Golf R壓軸猛將

新世代Volkswagen Golf家族已全部到齊，當然少不了「一哥」Golf R份，直噴引擎換上全新第三代2.0公升Turbo，馬力進一步提升至310ps，加速比以往任何一部Golf更快，4.6秒就可由靜止加速至100km/h，戰力非同小可！

售價：$529,980

跑化套件外觀惡辣

貴為旗艦車款的Golf R，唔止性能夠猛，就連外觀都惡過人，全車擾流套件都換上更具跑格的專屬款式，配合19吋大軨、四出排氣喉及Dual-L LED日行燈，賣相惡到出汁！史上最強量產Golf的銜頭，實力梗係有番咁上下，310ps的性能在2.0公升級別中已經對手不多，加上車價只是$50萬出頭，以高性能Hatchback嚟講都算得上親民價，實用得來又有速度，玩車一族又好、已為人父的爸爸又好，呢部車都畀到你需要嘅嘢。更何況香港車位嚴重不足，有錢買兩部車都未必有位泊，如果一部車同時畀到你實用及駕駛樂趣，係咪值得考慮呢？

全新第三代2.0公升Turbo引擎，最大馬力提升至310ps。

12.3吋全數碼化儀錶板屬標準配置，有多個顯示介面供選擇。

平底軚環更顯運動風格。

轉檔快速補油精準

換上新引擎的Golf R，容積依然是2.0公升，但性能及效率都雙雙提升，400Nm的峰值扭力早在2,000~5,400rpm便可完全釋出，在新娘潭路來回走咗幾轉，基本上有八成時間都在這轉速區行車，不吝嗇油錢地踩油，儀錶上的轉數計如火箭般直衝紅區，推背感相當強烈。同時，Golf R預載了4MOTION四驅及XDS+電子差速鎖，即使用到頗快的車速過彎，車尾都唔會兩頭走，軚扭幾多、車頭就轉幾多，甚少出現轉向過多或過少的情況，一般人都可以揸得有板有眼。一如GTI Performance，輸港的Golf R皆配上七前速DSG雙離合器波箱，唔單止轉波速度快，換檔時的精準補油更可媲美賽車手，為駕駛者帶來很大滿足感，很容易會令人覺得自己的技術突飛猛進。

頭燈整合了Dual-L LED日行燈，並於鬼面罩加上「R」徽章。

尾燈同樣用上LED，而且配上動態指揮燈。

原廠配上19吋輪圈，輪胎尺碼為235/35 R19。

三段懸掛應付激進路

Golf R的懸掛有三段軟硬度調校，應付起伏路面或激進操控都有出色表現，平日代步可以好舒適，揸去山路玩彎亦有足夠支持，有效抑制車身的傾側，任何時候都畀到四平八穩的感覺。正因為部車太定、太易揸，不自覺就會揸快咗，唔想咁快冇晒啲分要多留意車速。車廂方面，Golf R配備頂級的多媒體娛樂系統Discover Media，中控台的8吋觸控式屏幕採用玻璃光面設計，操作如平板電腦，除可控制資訊娛樂系統外，還加入了導航功能，配合12.3吋全數碼化儀錶板Active Info Cockpit Display，把Golf帶進全新的數碼化年代。

用藍牙將手機及車載多媒體系統連接，隨時隨地都可聽到心愛歌曲。	Golf R直噴引擎換上全新第三代2.0公升Turbo，馬力進一步提升至310ps，加速比以往任何一部Golf更快。	配上DSG自動波箱，性能得到完美發揮。
中控台屏幕有8吋大，車尾景物睇得一清二楚。	後排空間與標準Golf無異，設有3個座位。	前排配上桶形座椅，並附設加熱功能。