5招咕o臣運動 減下半身
打工仔日日出街食高熱量快餐和「垃圾食物」，久而久之令身體積聚過多脂肪，下半身更成為重災區，出現嚇人的「大象腿」與「豪華臀」。但炎炎夏日是露腰露腿的季節，減極唔瘦點算好？今回請來adidas星級教練Kit教大家5式家居咕o臣運動，毋須上健身室，輕鬆在家便能減掉多餘脂肪，慳錢又Easy，仲唔快啲跟住學？
代替「藥球」更方便
大家平日去健身室相信都有用過俗稱「藥球（Medicine Ball）」的小工具進行訓練！有冇諗過根本唔使畀入會費，在家中隨手拎一個咕o臣都可以代替藥球，發揮相同瘦身功效？Kit指出：「今次以咕o臣代替平時操練用的藥球，是因為咕o臣是常見的家居用品，幾乎每個屋企都有，十分方便，以其作健身工具會更易操控。」
集中訓練下半身
人人都怕有個大肚腩，今回訓練主要集中下半身，5組動作包括：Sitting Twists（坐立擺手）、Knee Crunch（曲膝蜷腹）、Windshield Wipers（腳部鐘擺）、V-Ups（V形仰臥起坐）及Leg Pull-In Knee-up（腿屈伸）都會借助咕o臣的重量去進行動作。Kit表示：「咕o臣雖然較一般藥球輕，但也有異曲同工之妙。基本上人人都可以試。大家要謹記量力而為，每組動作的速度不要太快，並注意協調性。此外，在運動以外應配合均衡飲食，日飲8杯水，每餐多菜少肉，雙管齊下，收身自然事半功倍。」
動作1：Sitting Twists（坐立擺手）
Step 1. 預備動作：先坐在地上，挺胸收腹，保持背部挺直；雙手捉緊咕o臣兩側，雙腳屈曲成90度，腳掌貼地。
Step 2. 身體平衡後，將咭o臣由左向右、右向左擺動，建議重複動作，維持約1分鐘。
動作2：Knee Crunch（曲膝蜷腹）
Step 1. 躺在地上，建議在尾龍骨放置坐墊作保護之用，手持咕o臣放在頭頂，雙腳提起離地並屈曲成90度。
Step 2. 背部應盡量貼地，利用腹部肌肉將上身慢慢蜷起。進行蜷腹時，收腹並呼氣，將咕o臣放到腳上（即前脛骨位置），保持平衡，然後慢慢下降到起始位置，交替重複同一動作，建議維持1分鐘。
動作3：Windshield Wipers（腳部鐘擺）
Step 1. 躺在地上，建議在尾龍骨放置坐墊作保護之用，雙手打開及保持身體平衡，雙腳伸直並夾實咕o臣。
Step 2. 雙腳伸直提起至腳底朝天，然後慢慢擺向左，回到中間後再擺向右；餘此類推，左右擺動，建議維持1分鐘。
動作4：V-Ups（V形仰臥起坐）
Step 1. 先躺下，手腳伸直，保持身體成直線，手持咕o臣並放在頭頂。
Step 2. 收腹將身體慢慢蜷起，直到手腳距離拉近；將咕o臣移到腳上，然後回到起始動作，重複交替，建議維持30秒~1分鐘。
動作5：Leg Pull-In Knee-up（腿屈伸）
Step 1. 先坐在坐墊上，雙手撐地，挺胸收腹，保持背部挺直，雙腳夾實咕o臣。
Step 2. 雙手微曲，雙腳屈曲收起並離開地面，再伸腿；期間保持雙腳離地，重複屈腿和伸腿動作，建議維持1分鐘。
個人檔案
Kit擁有REPs國際認可街頭健身導師資格，擅長於不同空間進行體能訓練。
撰文：黃秀敏
攝影：張群生
場地提供：adidas Training Base@D2 Place TWO