ZenFone Live 素顏直播變靚樣

自從facebook推出直播功能之後，唔少用家都喪玩Live功能，不過多唔多人Like首要睇內容，有個靚女主播自然事半功倍。想喺直播時執靚個樣，咁就要試吓ASUS新手機ZenFone Live，皆因它首創美顏直播功能，玩Live時可為人臉美顏，即係以後素顏上陣都可變靚女，呃Like都容易啲啦！

售價：$1,299（a）

千多元入門機價

ZenFone系列近年強攻中高階市場，如早前推出的ZenFone 3 Deluxe、ZenFone 3 Zoom等都賣三四千元，反而入門機嘅選擇唔算多。今次ZenFone Live就走入門路線，機價千多元就算Budget有限嘅用家都負擔得到。既然定位入門，外形和硬件就難以有高要求，幸好新機都有5吋大芒配以2.5D曲面玻璃，而塑膠電導機背則提供瑰麗粉、流沙金兩色，望落都幾高貴，加上機身僅重120g，長時間拎機都唔怕攰；惟屏幕只有720p級數，睇片質素只屬一般。

直播時可透過「BeautyLive」調校0至10級美顏，6級左右的效果最為自然。

直播時可透過「BeautyLive」調校0至10級美顏，6級左右的效果最為自然。

機背加入金屬質感，提供流沙金及瑰麗粉兩色。

BeautyLive十級美顏

新機個名叫得做「Live」，最大賣點當然係美顏直播功能，預載《BeautyLive》工具提供0至10級美顏轉盤供調校，而且可揀選不同直播平台，包括facebook、Instagram、YouTube。以facebook直播為例，用家只要於《facebook》App撳「開始直播」，進入直播畫面時「BeautyLive」就會變成懸浮按鍵，可隨時調校美顏等級，相當易用。要讚嘅係美顏效果唔突兀，直播時變換美顏等級亦見流暢。同時機身設有前置補光燈，在昏暗環境直播都可隨時幫手補光。當然，後置1,300萬像素鏡頭亦支援美顏直播功能，而且拍攝功能多多，包括HDR Pro、低光、濾鏡、全景、縮時攝影等，玩得更加靈活。

直播時會彈出BeautyLive設定，可隨時調校美顏等功能，仲有前置補光燈。

支援雙卡雙待，惟SIM 2與microSD卡不能同時使用。

兩組咪高峰收音

直播除咗畫面，聲音同樣重要，為此新機分別於機底及機頂內置兩組咪高峰，支援降噪及提升語音清晰度，直播現場講嘢都唔怕沙沙聲。其他硬件包括Qualcomm Snapdragon 400四核心處理器、2GB RAM均屬入門級別，幸好採用Android 6.0系統及ZenUI自家介面，整體操作都算流暢冇窒機。