無懼暴曬一物幾用汽車傘
泊車在露天地方，不但要日曬雨淋，仲隨時有鳥糞、果實從天而降，唔想部車受損，或者可以考慮這款由Lanmodo開發、現正進行眾籌的車篷。它藉着一個強力吸盤固定在車頂，開/閂只需8秒，全自動遙控操作，不但可擋隔外來物，甚至可當成沙灘遮、帳篷及投射屏幕使用，一物幾用，廠方介紹短片中，甚至從高處拋下磚塊，車篷都頂得順，以後泊街更加無後顧之憂。
車篷還有助降低車廂溫度，就算泊在沙灘暴曬，車廂都能保持涼快；設計上，它適用於大部分車型，無論房車、Pickup、SUV等都裝得到。安裝方面，除了車頂吸盤作為主要固定，還設有繩子可栓在側鏡及後門手把上，可抵抗13m/s的風速。此產品於Indiegogo集資中，並有不同組合可選，基本車篷預計零售價為399美元，但當然要留意「投資」涉及風險啦！
撰文：鄭浩文
網址：http://bit.ly/2oLeOD5