攻殼雕像1:6少佐極養眼
《攻殼機動隊》真人版電影正式上映，女神Scarlett Johansson唔單止演技出色，玲瓏浮凸身材仲非常養眼。嫌睇電影都仲未夠喉，最近Mtime推出的1:6雕像，正好讓大家帶「少佐」返屋企慢慢欣賞！
人手上色獨一無二
雕像以電影重頭戲水面戰為藍本，廠商在電影上映前半年已開始資料搜集，詳細分析劇照及演員身形面相，之後再繪製3D原型及打印3D手辦，經過反覆改良後，最後再交予韓藉師傅人手上色，因此每隻也是獨一無二。
缺乏配件美中不足
實物所見，個人認為頭雕有70%以上神似度，短髮、高鼻、面形幾可亂真，而且眼神具殺氣，比一般木口木面的人形Figure要有戲得多！身形則還原出Scarlett應有的曲線，膚色亦擬真，只嫌兩邊膊頭位太似護甲，若貼服一點會更似Thermoptic溫感戰衣。Figure美中不足是沒有任何配件，只跟一個專屬地台，方便陳列呃Like！
撰文：陳志滔
攝影：郭凱敏