紐約直擊18.5:9闊屏Galaxy S8 無邊視野

Samsung Galaxy S8向來受機迷關注，大家都想知道新一代「銀河機王」，能否挽回消費者對Note 7爆炸事件的信心。小記日前遠赴美國紐約出席「Unbox Your Phone」全球發布會，結果無令人失望，新機的無邊框18.5:9屏幕夠破格之餘，仲引進紫灰色機身，加埋創新人臉解鎖功能，4月21日於指定地區開售，相信有力重振聲威！

Galaxy S8將於4月21日在指定地區開售，售價約900~1,000美元（折約7,000~7,800港元）。

超闊屏震撼

如傳聞所說，新機備有5.8吋S8及6.2吋S8+兩個型號，兩者皆用上曲芒無邊框設計，既飛走實體Home鍵，又把指紋識別器移至機背，屏幕幾乎用盡左右兩邊空間，將比例拉長至18.5:9。小記即場試玩，發覺新機外形設計比S7更有創意，體積幾乎不變下，屏幕更大視野更廣，睇相睇片冇得輸！它有星夜黑、幻紫灰、極地銀、珊瑚藍和楓木金5色選擇，當中尤以紫灰色最靚，搶眼得來還改善了指模問題，有潔癖的人士可放心使用。

鬼臉秒解鎖

S8系列不但把虹膜識別技術移植過來，更進一步支援面部識別，無論是正臉、三七臉還是扮鬼臉，系統都能成功登記，速度甚至比指紋或虹膜更快。基本上舉機望一望前置鏡頭便能解鎖，前後唔使半秒。影相方面，前置鏡頭解像度微升至800萬像素，後置鏡頭則維持1,200萬像素，實拍所見對焦準、儲相快，取景時更可加入實時貼圖，呃Like更易。

提供金、黑、紫灰、藍及銀五色選擇，鏡面機背反光依然，但指紋問題大幅改善。

新機極速認到人臉，最正係扮鬼臉都登記到，其他人好難冒認。

經Bixby語音助理格價，系統會自動上網搵資料，相當聰明。

駁芒變電腦

S8及S8+皆採用八核心處理器，雖然官方沒有列明所用型號，但《AnTuTu》認到是最新Qualcomm S835八核處理器，跑分達164,464分，性能可說數一數二。另內置全新Bixby語音助理及DeX技術，前者可用於Shopping，例如購物時影一件貨品，系統會自動識別再即時上網搵相關價錢及潛在對手，格價啱用。而DeX技術則可將手機變電腦，只需把手機放上無線充電座，再接駁鍵盤、滑鼠及顯示屏即可如桌面電腦般流暢運作。