師情草意：回甘
回甘，一個對茶痴嚟講，熟悉不過嘅感覺。
對科學家嚟講，回甘係透過舌頭味蕾細胞上嘅甘味接受體，辨認到足夠數量嘅啟動分子，經化學作用（即茶多酚同蛋白質結合）後，將佢活化再傳至大腦，而令人感受到甘甜嘅感覺1。
對好茶人仕嚟講，回甘嘅感覺，形成於茶味中嘅苦與甜，在漸進交替中，所產生嘅回響。口腔中嘅苦味會隨着時間而消退，而甘甜之味就跟着引進2。
對西草藥師嚟講，回甘，可能又有另一層嘅意義……
傳統印度草藥學裏面，有一種同回甘有關，兼且十分有趣嘅藥草，名叫餘甘子，香港人多數叫佢做油柑子，佢嘅英文名普稱係（Indian Gooseberry /Amalaka），但Amalaka呢個名其實係梵文，而佢個正確學名則為Emblica officinalis / Phyllanthus emblica。餘甘子主要產地為東南亞地區，野生或人工培植都係常見，餘甘子嘅果實，可以生食，味道酸，且帶苦澀，但苦味過後，會喺口腔內留下甘甜，可以解渴，非常獨特。因此，佢好多時都被製成涼果小食或開胃餐前菜。
除此以外，餘甘子果實嘅保健同藥用價值亦早被發現及應用，餘甘子具有豐富維他命C、胺基酸及礦物質等3，不但可以補充體力，同時亦係傳統印度草藥師用嚟處理肚瀉、黃疸及炎症嘅好幫手。現代科研更開始咗發掘餘甘子喺處理糖尿病4,5及頑症6嘅可行性。
「平易近人」嘅餘甘子，佢嘅葉亦可以用嚟做枕頭，等大家有覺好瞓，瞓得甘甜。
苦盡甘來，當大家吃緊苦嘅時候，記得甘飴正喺前面等緊您。
Reference:
1.Chung, T. Y. & Tzen, J. T. C.（2014）. Molecular Mechanisms Responsible for the Umami Sensation of Teas. Journal of Agriculture and Forestry, 63（2）: 91-97.
2.https://kknews.cc/zh-hk/culture/636o83.html
3.Krishnaveni, M. & Mirunalini, S.（2010）. Therapeutic potential of Phyllanthus emblica（amla）: the ayurvedic wonder. Journal of Basic and Clinical Physiology and Pharmacology, 21（1）: 93-105.
4.Fatima, N., et. al.（2014）. Study of pharmacodynamic interaction of Phyllanthus emblica extract with clopidogrel and ecosprin in patients with type II diabetes mellitus. Phytomedicine : International Journal of Phytotherapy and Phytopharmacology, 21（5）: 579-85.
5.Usharani, P., et. al.（2013）. Effects of Phyllanthus emblica extract on endothelial dysfunction and biomarkers of oxidative stress in patients with type 2 diabetes mellitus: a randomized, double-blind, controlled study. Diabetes, Metabolic Syndrome and Obesity: Targets and Therapy, 6: 275-84.
6.Zhao, T., et. al.（2015）. Anticancer Properties of Phyllanthus emblica（Indian Gooseberry）. Oxidative Medicine and Cellular Longevity.
Alice Chan（陳雅詩）
（Reg. Psychologist）香港註冊心理學家
（Chartered Herbalist）加拿大特許西草藥師
M.Sc.（University of London）
High Dip. Pharma Tech.
Email：alice@wherbta.com
Dr. Bonita T.Y. Chan（陳德宜）
Registered Herbalist加拿大安大略省註冊西草藥師
（Nutritionist）營養學家
Ph.D（The Chinese University of Hong Kong）香港中文大學生化博士
前美國Baylor College of Medicine,Texas Medical Centre疾病機理研究員
前美國University of Pittsburgh疾病機理研究員
Email：bonitatychan@wherbta.com
網址：www.facebook.com/wherbta