G6機王襲港18:9眼界大開

LG機王G6上月底於MWC（Mobile World Congress）發布，有傳國際版要等到4月初才在港上市，不過廠方向來奉行「本國優先」政策，因此韓版G6日前已正式開賣，水貨仲話咁快抵港！小記率先拿到真機實測，其18:9闊屏確實令人眼界大開，加上1,300萬像素雙鏡頭破格玩正方相片，一於早買早享受啦！

G6 售價：$6,180

煲劇飛走黑邊

G6棄用上代「好睇唔好食」嘅模組化設計，一體成形機身加入啞色金屬邊框，機背鏡頭由凸變平，既可減低刮花風險，又提升整體美感，講靚仔可說完勝上一代。FullVision屏幕是新機最大賣點，上下兩條邊框大幅收窄，令機身大細在幾乎不變情況下，屏幕由上代的5.3吋加大至5.7吋，解像度達2,880×1,440，破天荒支援18:9顯示比例，可說全球首創！目前正在Netflix熱播的《House of Cards》正正以18:9比例拍攝，以G6播放時會自動將「黑Bar」飛走，視野比16:9屏幕廣闊得多。再試對應遊戲《Spider-Man Unlimited》，畫面亦睇得更廣，予人新鮮感。

睇片廣闊<br>G6（上）大小跟G5（下）相若，但屏幕變得更大，而且18:9屏幕睇片時可飛走黑邊，視野闊好多。

睇片廣闊
G6（上）大小跟G5（下）相若，但屏幕變得更大，而且18:9屏幕睇片時可飛走黑邊，視野闊好多。

打機更爽<br>《Spider-Man Unlimited》支援全闊屏，用G6（右）玩遊戲時可顯示更多內容，臨場感更佳。

打機更爽
《Spider-Man Unlimited》支援全闊屏，用G6（右）玩遊戲時可顯示更多內容，臨場感更佳。

採用USB Type-C介面，旁邊設有喇叭。

支援Hi-Fi音效

G6是全球首部同時支援Dolby Vision及HDR10的智能手機，實測所見畫面清晰，光暗對比具層次感，最重要是顏色還原度高，絲毫沒有味精感覺。有靚芒自然要夾靚聲，內置32-bit Hi-Fi Quad DAC晶片組可降低聲音雜訊及失真水平。插上耳機試聽《MOOV》內的《不了情》Hi-Fi無損音樂，人聲立體感即時提升，背景樂器聲清晰通透，而且使用時可調校最高音色及左右聲道輸出，相當貼心。針對戶外聽歌煲劇需要，新機電量微升至3,300mAh，理論上夠用一天以上；較可惜是不能換電，但一體式密封機身令它符合IP68標準，防水防塵無懼風雨。

機背備有1,300萬像素雙鏡頭，下方設有招牌Rear Key。	首批韓版為單SIM版本，可加裝microSD卡。	預載《Smart Doctor》可優化記憶體及調校省電模式。
插入耳機後能啟動Hi-Fi Quad DAC模式，有效降低聲音雜訊及失真水平。	硬件規格唔差，《AnTuTu》跑分有124,934分，表現中上。

雙鏡頭多玩法

雙鏡頭向來係G系手機賣點，新機後置的1,300萬像素雙鏡頭，分別支援標準71度F1.8大光圈及125度F2.4廣角拍攝，一按虛擬掣即可切換焦距，當中後者Wide得來唔變形，可容納更多景物。功能方面，手動Mode、超廣角、慢動作、360度全景都是「例牌菜」，特別在加入Square Camera模式，可將18:9畫面分拆成兩個正方形視窗，用家可在其中一邊拍攝1:1照片，毋須裁剪便能擺上Instagram或Snapchat。此模式還可用於前後鏡同步拍攝、連拍及創作四格相片，玩法多變。售價方面，此機韓國本土賣899,800韓圜，折合約HK$6,087，家陣水貨價格相若，顏色仲有齊黑、白、銀3色選擇，惟首批貨量不多，想買就要快手了！